CC BY
4УДК 929:94(477.75)
БОТ: 10.22378/кю.2022.2.137-148
Усеин Абдуррефиогълу Боданинский (1877-1938) хусусында белли олмагъан малюматлар
Исмаил Керимов
(Татарстан Джумхуриети Илимлер Академиясы, Ш. Марджани адына тарих Институты; Къырым муэндислик ве педагогика университети)
Ачыкълама. Сонъ сенелери Москванынъ меркезий кутюпханесинде БИКАМЗнынъ эсасчысы У.Боданинский иле багълы тапылгъан малюматлар зема-невий тедкъикъатчылар ичюн белли дегильдир. Шулардан энъ муими ве къыймет-лиси Багъчасарай "Тёле" вакъфынынъ маддий дестегидир ки, буюк къысымлы пара (1800 кумюш) онынъ Акъмесджиттеки оджалар окъув юртуны битирген сонъ, къолуна берильмесидир. Тамам шу пара У.Боданинскийнинъ Москвагъа бармасы, ерлешмеси ве андаки Строганов адына рессамджылыкъ окъув юртунда тасиль ал-масына эсас дестек олгъандыр. Янъы малюматлар арасында У.Боданинскийнинъ 1916 сенеси Таврия губернаторына ве С.-Петербургдаки "Медений ве Тарихий Абиделерни Къорума Джемиети"не мураджаатлары да булунмакътадыр. Булардан гъайры, чокъ аз белли яхут ич де белли олмагъан У.Боданинскийнинъ 1915 ве 1916 сенелеринде Къырымгъа кельмелери ве шу арада Багъчасарайда ерли генчлернинъ иштиракиле къурулгъан "Санат ве Этнографияны Севиджилер Джемиети"ни теш-киль этмесидир. Шу джемиет азаларынынъ маддий къол тутмалары Багъчасарай тарих ве этнография музейини ресмий ачылмасына ве сонърадан аят корьмесинде буюк роль ойнагъандыр. Чюнки "Джемиет"нинъ бутюн азалары эр сене "Джеми-ет"ке азалыкъ вергисини тёлемекте эдилер.
Анахтар сёзлер: Багъчасарай музейи, Усеин Боданинский, Къырымтатарлар-нынъ тарих ве медений абиделери.
Ялынъыз бу дегиль, аслында бир чокъ язарлар, оджалар, рессамлар, хэкимлер, театро хадимлери ве дигер эдиплеримиз ве атта буюк сималары-мызнынъ аяты ве фаалиетлери бу замангъаджа керекли дереджеде огре-нильмегенинден, сонъки вакъытларда аман-аман бир чокълары акъкъында эп янъы-янъы малюматлар ве чешит муим хаберлер мейдан алмакъта. Бундан эввельки языларымызда къайд эткенимиз киби, бунынъ эсас себеби
- дженктен эввель ишленильген ве басылгъан буюк къысымда олгъан ма-териалларнынъ халя "джансыз" яткъанларындадыр. Иште, къаранлыкъта булунгъан шейлернинъ тек бир уджу, кучюк бир джюзю, ярыкълатылып ачылгъанда, табий, не архивлерде (русча), не кутюпханелерде, не де чешит дигер махфузатларда булунмагъан шейлер, малюматлар, фактлар чыкъ-макъталар ки, эдиплеримизнинъ шахсиетлерини, биографияларыны ай-дынлатып, къырымтатарынынъ умумий ичтимаий-миллий-медений кети-шатыны да кереги киби ачыкъламагъа ярдым этмектелер.
Хронологик джихэтинден булар чокъсу Х1Х асырнынъ сонъу ве ХХ асырнынъ башларына аиттир. Ама кенишче алсакъ, вакъты-вакътынен бу хронологик черчиве де тек шартлы оларакъ бельгиленмекте.
Усеин Боданинский хусусында лаф кетер экен, аятындаки, биографий нокъталарындаки, хусусий ве энъ "индже" ерлерини косьтерген факторла-рындан бири - табий, онынъ Москвадаки Строганов рессамджылыкъ окъув юртунда маддий дурумыны кимлер теминлегендир, аджеба? Усеин Бода-нинский акъкъында бугуньде бир сыра макъале ве китаплар язылса ве не-шир этильсе де, бу хусуста ич бир тюрлю хабер берильмей!
Меселенинъ аслы исе, шулардан ибареттир. 1875 сенеси январь 17 ку-ню Акъмесджитте Арсланбей Ташиогълу адлы зенгин киши рахметли олып, мирас сыфатында Багъчасарай дживарындаки Тёле коюнинъ буюк топрагъыны вакъыф къалдыра. Онынъ васиети боюнджа, шу вакъыф то-пракътан кельген параларны къырымтатарларынынъ тасиль меселелерине къулланылмакъ шарт эди. Иште, мульк васиси (душеприказчик) олгъан Исмаил мырза Муфтизаде вакъыф парасындан 1800 кумюшини Усеин Бо-данинскийге айырып, онынъ Москвада окъумасыны темин эте [1]. Эгер де о замандаки ишчининъ орта бир айлыгъы 30 рубле экенини бильсек, 1800 рубле баягъы пара олгъаныны анълаймыз.
Хайырсевер Арсланбей Ташиогълу озь вакътында Къырымда белли адам олгъаныны билемиз. И.Гаспринский о акъкъында "Терджиман"да, сырасы булунгъанда, чешит хаберлер берип тура эди. Меселя, та 1892 се-неси Къырым хайырсеверлери акъкъында язы язаркен, оны чокъ хош сёз-лернен анъып, янына Кефе уездинден олгъан Абдульмеджит Абдуль-къадырогълунынъ адыны да къошмакъта. Бу сонъкиси кенди мулькюнден 1500 дёнюм топракъ чешит хайыр ишлерге васиет этип, шулар арасында медресе окъув юртларынынъ кереклилерини темин этмек ичюн де, яни та-силь меселелерине де, пара айыргъаныны анълата. Ишбу васи топракъ 100.000 (юз бинъ!!!) рубле къыйметинде олгъаны козь огюне алынса, о за-маннынъ варлылары миллий тасильге, миллетнинъ келеджегине, насыл козьнен бакъкъанлары чокъ ачыкъ корюнмекте [2].
Генч Усеин Боданинскийнинъ характер чизгилери акъкъында бильмек гъает онемлидир. Чюнки онынъ Багъчасарайда музей ачмасы арекет-
леринде бу чизгилер буюктен-буюк роль ойнагъандыр. "Тёле" вакъфындан буюк пара альт окъугъан У.Боданинский, окъувыны тамамлап кенди башына пара къазанмагъа киришкенинен, аман алынгъан ве файдала-нылгъан параны къайтармасы ве дигер талебе окъутылмасы меселесини тюшюнерек, Ташиогълунынъ васиси олгъан И.Муфтизадеге махусус мек-тюпле мураджаат эте. И.Муфтизаде чокъ буюк бир ибрет оларакъ ве сами-мий гъурур, ифтихарнен шу мектюпни "Терджиман"гъа кондерип оны бойле тарифлемекте: "Хурьметлю мухаррир эфенди. Бу куньлерде ал-дыгъым бир мектюп мени зиядесиле севиндирди хэм хайрете къойды. Вакъа ибрет ве имсаль оладжакъ бир шей олдугъындан, дердж идильмеси-ни теменни идиюрыз. Мерхум Арсланбек вакъфындан истифаде идерек, тахсиль-ильм итмиш бир хэйли генчлерден бири олан рессам Усеин Боданинский, анълашылдыгъына коре, къазанчындан махрум олмадыгъына би-наэн, вакъуфтан алдыгъы 1800 рубле акъчайы тедриджен (къысым-къысым) кери къайтармая ве бу суретле ихтияджлы башкъа бир генчнинъ даха тахсиль маарифине муавенет идильмесине арз ве беян идерек, бирин-джи такъсит оларакъ 100 рубле акъча кондерди. Бунынъ иле берабер Пе-тербургда рессам мектебинде муавенете (ярдымгъа) мухтадж къырымлы Яхья Шемси Алядинов булундыгъыны хабер вирди. Ики-учь сене зарфын-да 1800 рублейи къайтармакъ ниет-хайриесинде булунан Усеин эфенди Боданинские арз тешеккюр идерек, бу дефа кондердиги 100 рубленинъ мезкюр Яхья эфенди Шемси Алядиновгъа вириледжегини хабер идиюрым. Арсланбек вакъфындан муавенет алмыш генчлеримиз аягъа бастыкълары халда, къадирбилир Усеин эфенди киби муамеле итселер, шубесиз, бир къач киши даха окъутмакъ мумкюн олурды!!!" [1].
Табий, бу олай, яни талебе окъув парасыны вакъыфкъа къайтармасы, чокъ сийрек олгъанындан, эм де ялынъыз къырымтатарлары арасында дегиль, Усеин Боданинский бу чизгисинен бутюн дигер къырым генчле-ринден айрылып тургъаныны коремиз. Характерининъ бу чизгилери вира шекилленгени ве илерилегени де корюнмекте. Азбучукъ буюгенинден сонъ, атта иштирак этмеген тетбирлерге "кечь олса да" къошулып, тетбир-де талебелер менфаатына (яни миллетнинъ келеджегине) топлангъан пара-ларгъа озь къысмыны да къошып кондере [3]. Сонъундан онынъ арекетле-ри миллий медениетимизни, маддий санат варлыгъымызны, цивилизация-мызны огренмек, топламакъ ве къорумакъ меселесинде Къырым ичюн сонъ дередже буюк роль ойнагъандыр.
Усеин Боданинский Акъмесджитте догъса да, иптидаий тахсилини Багъчасарайда алды. Эм де тамам бу ерде ресим япмагъа авеси корюнди. Иптидаий тахсильден сонъра, кене Акъмесджитке кетип "Татарская учительская школа"сында окъуды. Ве бу ерден Москвагъа кетип андаки Строганов ресим мектебине кирген эди. Ресим ве нагъыш устасы сыфатында
кендиси тахсиль кечкен Строганов окъув юртунда бир къач сенелер оджа-лыкъ япты. 1907-1909 сенери арасында Истанбул, Париж, Мюнхен ве Дрезденде булунды. Буюк санаткярларнынъ ишлерини корьмек, огренмек ве кендисининъ санатыны илерилетмек ичюн 1912 сенеси Италиягъа кетип Рим, Венеция, Флоренция, Сиена шеэрлериндеки асар-и-атикъанен таны-шты [4, с.9]. 1914 сенесинден башлап Петроградда булуна ве мындаки рес-самлар арасында танылгъан киши сыфатында о ерде къурулгъан буюк музей ве биналарнынъ тахсинат (гузеллештирме) ишлерине давет олуна.
Белли эдибимиз Осман Акъчокъракълы "Терджиман"да чалыштыгъы заман, фурсат буларакъ, 1915 сенесининъ декабринде, Усеин Боданинский Багъчасарайда булуныркен, корюшювлерини бир къыскъа парчада бойле анълаткъандыр: "Усеин эфенди ватаныны, Къырымны гъает севен бир рес-самдыр. Багъчасарайда булундыгъы куньлерде, арамызда бир къач се-неденбери сёйленюп де ише башланыламаян миллий музейхане меселеси-ни къозгъаюп, бирликте булундыгъымыз бир меджлисте, Багъчасарайда бойле бир музейханенинъ мумкюн къадар аджеле оларакъ вуджуда кети-рильмеси хусусында бахслара ёл ачты ве кендиси керек маддий ве керек маневий джихэтлерден ярдым идеджегини ваад идуп, музейханее эсас ола-ракъ кендисинден 100 рубле къайд идуп ве музейханейи ачмая ёллар ара-штырмакъ ичюн Петрограддаки "Асар-и-атикъайы Химае Джемиети"не мураджаат идеджегини ваад итти.
Усеин эфенди Багъчасарайда икен, мерхум Исмаил бек Гасприн-скийнинъ къабри узерине япыладжакъ тюрбенинъ бир лейхасыны дахи ха-зырлаяджагъыны ваад итти.
Усеин эфенди 35 яшларында бир кишидир. Табий, буюк бир истидат сахиби олдугъындан, рессамлыкъта даха чокъ теракъкъи идерек, шухрет кесб идеджеги шупхэсиздир. Биз бунъа дуаджымыз!!! [5].
Яни къач вакъытлардан берли тек дискуссияларда (лакъырдыларда) кечирильген корюшмелерге нетидже чекмек ичюн Усеин Боданинский джебинден 100 кумюш (учь айлыкътан зияде!!!) чыкъарып ортагъа ташлай... Ве бу парагъа эндиден сонъра Багъчасарайда эхалининъ къолунда сакълангъан эски ве уникаль эшьяларны сатын алмагъа имкянлар ачыла. Яни Багъчасарайдаки Тарихий Музейининъ темели 1917 дегиль де, 1915 сенесининъ декабринде Усеин Боданинский тарафындан къоюлгъан эди. Меселенинъ бюрократия тарафына бакъаджакъ олсакъ, кене де У.Бода-нинский ресмийлештирюв меселелерини бойнуна алып, Петрограддаки "Асар-и-атикъайы Химае Джемиети"не мураджаат этеджегини ваад эте. Даа догърусы, о ерде йыллар девамында бераберликте чалышкъан ве ид-жат эткен таныш-билишлери ве достларынынъ ярдымынен бу меселе зор-лукъсыз чезиледжеги анълашылмакъта.
Осман Акъчокъракълынынъ бу парчасына огърамагъанджа, Исмаил Гаспринскийнинъ къабир ташы У.Боданинский тарафындан ишленгени ич де акълымызгъа кельмез эди. Бу таш (хорасы иле комплекс эсер) сонъ-ундан И.Гаспринскийнинъ исми чешит йылларда шерефлениркен, фото оларакъ онларджа дефа чешит миллий газета ве журналларда корюнген-дир. Табий, У.Боданинскийнинъ санат эсерлери айрыджа бир джедвель сыфатында ясалгъанда, бу эсер де, Гаспринскийнинъ къабри комплекси, айры бир эсер сыфатында косьтерильмеси шарттыр.
У.Боданинский Петроградда чалыштыгъы тенеффюслеринде, сыра бу-лундыкъча кене Къырымгъа, Багъчасарайгъа, келип музейхане меселеле-рини чезмеге огъраша. 1916 сенеси майыс айында Багъчасарайда къалып, белли бир муддет зарфында шеэрдеки асар-и-атикъанынъ химае ве му-хафазасына, къырымтатар миллий санайи-нефисеси яшаталмасына хызмет этмек узьре бир "Асар-и-атикъа Хамилери (химаеджилери) Джемиети" иле "Тарихий асар-и-нефисе музейханеси" мейдангъа кетирильмесине чалыша [6]. Ишбу тешкиль этилеледжек "Джемиет" ве "Музей"ни ресмийлешти-рильмеси ве къорунмасы ичюн Петрограддаки "Русиеде Абиделер, Нефис Санатлар ве Асар-и-Атикъайы Химае ве Мухафаза Джемиети"нинъ къана-ты тюбюне алынмасыны арз этерек, У.Боданинский шу "Русие Джемие-ти"не мухусус аризасыле мураджаат эткен эди. Иште, шу мураджаатына 1916 сенесининъ майысында ашагъыдаки джевапны алгъандыр:
"Рессам Усеин Абдуррефиогълу Боданинские. "Русие Абиделер, Не-фисе Санатлар ве Асар-и-Атикъайы Химае ве Мухафаза Джемиети"нинъ такъип иттиги эмеклерине иштирак иле Багъчасарайда бир шубе ачмакъ арзу иден хэйете байдасыз олмакъ узьре джемиет-и-мезкюр самимий те-шеккюраты такъдим идер. Багъчасарайда ойле бир шубе ачмакъ ичюн джемиет ве иттифакълар хакъкъындаки къанунлара бинаэн Къырым вали-сине бир беяннаме такъдим идильмели ве айны заманда джемиетин низам-намеси ве Багъчасарайда тешкили тасаввур идилен джемиет муэссиселери-нинъ исм ве махаль-икъаметлери дахи кондерильмелидир.
Реис: Великий Князь Николай Михайлович.
Реис муавини: Е.Н.Волков.
Кятип муавини: С.Л.Бертенсон [7].
У.Боданинский Петрограддаки "Русие Абиделер, Нефисе Санатлар ве Асар-и-Атикъайы Химае ве Мухафаза Джемиети"нден бойле джевап ал-гъан сонъ, Багъчасарай хавескяр генчлерини этрафына топлап "Багъчаса-рай Асар-и-атикъа Хамилери (химаеджилери) Джемиети" иле "Тарихий Асар-и-нефисе Музейханеси" мейдангъа кетирильмеси ичюн валиге истида (дилекче) азырлай. Ишбу дилекчеде хавескяр джемиетинде иштирак эткен
бутюн зеватларын (кишилернинъ) имзалары булунмакъ керек эди. Ве губернатор дженабындан рухсет алындыгъы киби, джемиетин тешкилине тешеббюс идиледжек ве джемиет ише башлаяджакътыр [7].
А.С. Айвазов бу хаберни азырларкен, миллетке даа ачыкъ анъла-шылсын ве айдынлансын дие Багъчасарайдаки "Джемиет"нинъ ишини ин-джеден тафсилятлай: "Багъчасарай Асар-и-Атикъа Хамилери (хима-еджилери) Джемиети" исминден дахи анълашыладжагъы узьре шехримиз ве дживарында булунан эски джамилери, медреселери, дюрбелери, меркъадлары (мезарларны) ве чешмелери, хамамлары, биналары химае идуп, бунларын бозулмамасына, хараб олунмамасына чалышаджакътыр. Керек миллий, ве керек гъайры-миллий Къырымда асар-и-атикъа-и-нефиседен хэр не варсе, бунлары араюп буладжакъ ве хэпсининъ ресимле-рини алуп джамлы черчиве ичинде оларакъ "Джемиет" янында ачы-ладжакъ музейханеде булундыраджакътыр! Къырымтатарынынъ эски мил-лий санайи-нефисесинде олуп да хазырда эльде булунмаянларыны араюп-булуп музейханее къояджакътыр! Ве бунларын бундан бойле дахи баш атылмасы ичюн джемиет, вакъыт булдыкъта, янында бир де миллий са-найи-нефисе мектеби ачыладжакътыр! Бу "Джемиет"е хэр истеен аза ола билир. Азалыкъ хакъкъы 5 рубле оладжакътыр. Бир кереден 100 рубле яки 100 рубле къыйметинде эски бир ший виренлер, джемиетин фахрий азасы сайыладжакътыр! Миллетини, медениет-миллиесини, миллий санайыны, эдждадынынъ быракъуп киттиги асар-и-атикъа-йы-нефисесини севенлер ве бунларын химае ве мухафазасыны илелебед (сонъсуз) яшамасыны джидден арзу иденлерин, мезкюр джемиете аза языладжакъларына, онъа маддий ве маневий ярдымда булунаджакъларына шупхэ итмейиз, шехримизде теш-киль идиледжек "Асар-и-Атикъа Хамилери Джемиети"нинъ джанланмасы, кемал фаалиетле иш корьмеси ве такъип иттиги макъсатларыны тезликле хусула кетирмеси, азасынынъ чокъ ве кассасынынъ зенгин олмасына багълыдыр. Бунынъ ичюн эдждадымызын асарына хурьмет иденлер, миллий санайы-нефисемизи джидден севенлер ве медениет-миллиемизин оль-мемесини арзу иденлерин мезкюр джемиете керек аза язылмакъ, керек эшья вирмек ве керек дигер ёлларле ярдым итмелери миллий ве медений бир бордждыр! Шехримизде ойле бир джемиетле тарихий асар-и-нефисейи-миллиемизи хави (ичине алгъан) бир музейханенинъ булунма-сынынъ шехэр ичюн маддий бир фаидеси де оладжакътыр! Бу муэссиселер иле Багъчасарай кендисине пек чокъ мусафир джельп идеджек ве бу саеде шехэр дахи бир къат даха джанланаджакътыр! Бунынъ ичюн умит идериз ки, бу хусуста хэр кес элинден келен ярдымы эсиргемез (аджымаз). Мез-кюр джемиетин ресмен тешкиль ве тесис идеджеги вакъты айрыджа илян олунаджакътыр [7].
100 йыл эввель айтылса ве язылса да, не къадар догъру, айдын ёлкось-термелер, самимий истеклер! Музей янында "Миллий Санайи-Нефисе Мектеби" бугуньде биле арз этильген, мейдангъа кетирильген шей ола-майып, чокъусы тесадуфий расткельген хавескяр мутехассысларле иш алынып барылмакъта. Миллетни "Джемиет" азалыгъына джельп этмек макъсады исе, сонъ дередже муим ве керекли бир меселедир ки, генчлерде миллий анъ, миллий дуйгъу, миллий рух, миллий шуур ашламакъ ичюн бундан зияде алет булунамаз. Та о заманда кучюк шеэрнинъ гъает джиддий келири бойле музейлерден гъыда аладжагъы да бугуньде Багъчасарай му-зейлери мисалинде чокъ гузель корюнмекте. Яни У.Боданинский Петроград музейлерининъ чешит ишлеринде иштирак этеркен, музей ишининъ энъ индже, энъ назик нокъталарыны корип, анълап, дуйгъуланып, олар-нынъ бутюн усьтюнликлерини, озелликлерини Къырымда ачыладжакъ му-зейлерге синьдирмек, ашламакъ ниетинде эди.
У.Боданинский 1915 - 1916 сенелери ичинде Багъчасарайда сыкъ-сыкъ булунгъанындан, яваш-яваш джемаат арасында белли олгъан шахскъа чев-риле. Оны Багъчасарай ве дигер шехэрлердеки чешит топлантыларгъа, миллий эмиети олгъан тедбирлерге давет этмеге башлайлар. Меселя, 1916 сенеси июнь башында Акъмесджитте олып кечкен гъает муим бир иджти-магъа (топлашувгъа) давет этелер. Бу топлантыда Къырымнынъ мутебера-ны (юксек статуслы кишилери) мусульман хастаханеси меселеси этрафын-да къонушмада булуналар. Усеин Боданинскийнинъ русчасы мукеммель олдугъындан, оны русча кятипликке сайлайлар. Шу топлантыда къырым-татарджа кятипликни исе, "Терджиман"нынъ баш мухаррири А.С. Айвазов беджере [8].
У.Боданинскийнинъ 1916 сенеси июнь-июль айлары ичинде Таврия губернаторына язгъан мектюби сакъландымы, ёкъмы - белли дегиль. Ама "Терджиман"нынъ хаберине коре, У.Боданинский тарафындан Таврия губернаторы адына бойле мектюп язылып, шунда Багъчасарай шеэринде миллий музей ачмакъ меселеси къоюлгъан эди [9].
У.Боданинскийнинъ музей ачмакъ меселесинде тедбиркярлыгъы ве фааль арекетлери джемаатымызгъа да чешит мусбет тесирлер быракъ-макъта эди. Къырымнынъ чешит кошелеринде газетлерде акс этильмекте олгъан хаберлерге верилерек, бу меселеде кенди къайнакъ фикирлеринен болюшеджеклер вира мейдан алмакъта эдилер. Бир ялыбойлу киши артыкъ дуйгъу ве фикирлерини анълатмакъ ве У.Боданинскийге къолтутмакъ ние-тиле "Терджиман"гъа шу сёзлериле мураджаат эте. Меракълысы шу ки, адам кенди адыны да язмадан, "Бир ялыбойлу" тахаллюсини къуллан-макъта: "Мухтерем рессамымыз Усеин эфенди Боданинские! Миллетлерин мазисини (кечмишини) истикъбальде яшатаджакъ, шупхэсиз, асаридир. Бинаэналейх, эсляфын (кечмишнинъ) асарини мухафаза итмек (сакъла-
макъ) борджумыз ве вазифемиздир. Бу бизим ичюн о дередже мухтерем ве мукъаддес бир вазифедир ки, намымыз унудылмасыны истемезсек, бизим де бизден сонъра келеджеклер назарларында ибретимиз олсун..."[10]. 1918 сенесининъ январь айында большевиклер ве эски идаре кучьлерининъ токънашувлары олып кечтиги заман, Багъчасарай шеэринде чешит тин-тювлер, хырсызлыкълар, зорбалыкълар къалабалыгъында "Терджиман" чыкъып турса да, онынъ сутунларында У.Боданинскийнинъ ады растлан-май. Санайи-нефисе иле багълы сонъ хаберлерден Акъмесджит уезди зем-ствосынынъ сонъ топлашувында Багъчасарай татар хунер ве санайи мекте-би ичюн даима ярдымда булунмакъ къарар алындыгъы хабер этиле. Ама бу ярдым "Багъчасарай шехэр идаресининъ дахи иштирак итмесиле шарт имиш"... Ве санайи-нефисе мектебининъ низамнамеси - мудир Абдуррефи Абиев тарафындан танзим идилерек (тертипленерек), бу куньлерде земство иле ве саир махаллере такъдим идиледжектир - дие ачыкъланмакъта [11].
Юкъарыда кетирильген материаллардан ап-ачыкъ корюнмекте ки, Усе-ин Боданинский Багъчасарайда миллий санайи-нефисе музейини ачмакъ ве миллий санайи-нефисени химае ве къорума джемиетини тешкиль этме ишлеринен 1910 сенелерининъ биринджи ярысында башалап, 1915 сенесин-де энди кендинден пара да айырып базы музей экспонатларыны халкъ элин-ден сатын алмагъа киришкендир. Музейни ве Джемиетни ресмийлештирмек меселесини де кенди бойнуна алып керекли тешкилятларгъа ве айрыджа Таврия губернаторына махусус арзнамелер язып кондергендир. Яни Усеин Бо-данинский Багъчасарайдаки миллий санайи-нефисе музейининъ баниси, къуруджысы ве эсасчысы оларакъ таныла билир!
Исмаил бек вефатынынъ 3-нджи сене-и-девриеси мунасебетиле (1916)
ИЛЯВЕ
У. Боданинский
Сентябрь 11 куню "'Терджиман"нынъ унудылмаз муэссисининъ терк-и-хаят (вефат) иттиги тарихи миллий бир матем кунюдир. Исмаил бекин бизлере веда идуп алем-и-бекъае (обир дюньягъа) чекильдиги там ики сене олды. Аджеба, мерхумын эбедий оларакъ бизлерден айрылмасыле алем-и-ислям, ве бильхасса Русие императорлыгъында, яшаян мусульманлар не гъайып иттилер? Бу суале джевап вирмек шимди кучь дегильдир. Хаят-ы-ичтимаемизин хэр сахасы оксюз къалды. Миллий матбуатымыз ёлбашчысындан, рехберинден халкъымыз кен-дисини бирлештириджи реисинден мекятиб-и-ислямие (ислям мектеплери) баба-сындан ве атешли муджиддинден (фааль чылышыджысындан) айрылды. Му-сульманларын икърар (ачыкъ сёйлеген) теракъкъиперверанеси (инкишафчысы) кендисини джанландыран амелинден махрум къалды. Факъат бутюн бу зиялыла-рын буюклигине рагъмен, бизлер меюс (окюнчли) олмалыйыз. Буюк муаллимими-
зин зайяне (гъайыбына) агъламакъле берабер бизлер онынъ нам-ы-алийси этрафы-на бирлештирген Исмаил бекин мирас оларакъ быракътыгъы фикир ве эмеллерини хич хатырдан чыкъармаюп, хич бир дакъикъа февт иттирмеден (къачырмадан) онларын вуджуда кельмесине вар къувветимизле чалышмалыйыз. Хэр зиялы мусульман халкъымыз фаидесине бир иш япмалыдыр. Медениет ве умран (илериле-ме) хусусында бизлер чокъ кери къалдыкъ. Бунынъ ичюн кендимизи йине кенди-миз дигер медений миллетлер сырасына къоймакъ ичюн бутюн маддий ве маневий къувветлеримизи топлаюп чалышмалыйыз.
Огюмизде пек чокъ ишлер вар. Бизде мектеп ёкъ, сервет ёкъ, бизде хаят-ы-ичтимае гъает зайыфтыр. Халкъымызын айры сыныфлары арасында айрылыкъ, гъайрылыкъ мевджуттыр. Бизде халь идильмиш пек чокъ мухим меселелер вар-дыр: эфкъаф (вакъыфлар), махкеме-и-шерие, мектеп, медресе муэссиселери бунлар джумлесиндендир. Бунларын хэпсининъ арзу олундыгъы суретте халь идилюп тертип ве интизама къонулмасыны джандан истиюрыз.
Бизде сынф-ы-муневвере къуввети аз олдугъындан, хэпимизе бирлешмек, хэм де мерхум Исмаил бекин нам-ы-алиеси этрафында бирлешмек лязимдир. Зира арамызда екяне реис-и-манивиемиз о танылмыштыр.
Исмаил бекин исми ве фикри бизе къаранлыкъ кузь гиджелеринде ёл косьте-риджи бир йылдыз олмалыдыр. Эгер бизлер умумий идеал иле къавий оларакъ бирлешир, маариф силяхиле силяхланыр ве кемал дикъкъат ве мухаббетле бизе ачылмыш чыгъыр иле китерсек, хич бир дюрлю къаранлыкъ бизи къоркъутамаз ве, нихает, бизлер арзу олунан саадет ве теракъкъие наиль олурыз.
Багъчасарай, 1916, 11 сентябрь
ЭДЕБИЯТ
1. Муфтизаде И. Идарее мектюп // Терджиман. 1913. ноябрь 6.
2. Мухбир. Заговорив о добром деле... // Терджиман. 1892. октябрь 25.
3. Мухбир. Алуштада олмыш кезинти фаидесине // Терджиман. 1916. № 175. август 14.
4. Мусаева У.К. Народный учитель. Документальный очерк деятельности выдающегося крымскотатарского просветителя Усеина Боданинского/ Под ред. А.А. Непомнящего. Симферополь: ОАО «Симферопольская городская типография». 2007. 240 с.
5. Акьчокьракълы О. Рессам Усеин эфенди Боданинский // Терджиман. 1915. № 271. декабрь 11.
6. Мухбир. Усеин эфенди Боданинский // Терджиман. 1916. № 101. майыс 5.
7. Айвазов А.С. Багъчасарайда «Асар-и-Атикъа Хамилери Джемиети» теш-киль меселеси // Терджиман. 1916. № 105. майыс 12.
8. Мухбир. Къырымда мусульман хастаханеси хакъкъында иджтима // Терджиман. 1916. № 119. июнь 2.
9. Мухбир. Багъчасарай. Рессам Усеин Боданинский дженаплары... // Тер-джиман. 1916. № 142. июль 1.
10. Бир ялыбойлу. "Асар-и-атикъа ве миллий санайи-нефисейи химае джемиети" ачыладжагъы мунасебетиле // Терджиман. 1916. № 191. сентябрь 4.
11. Мухбир. Татар санайи мектеби // Терджиман. 1918. № 10. февраль 2.
Неизвестные материалы об
Усеине Абдуррефиоглу Боданинском (1877-1938)
Исмаил Керимов
(Институт истории им. Ш. Марджани АН РТ; Крымский инженерно-педагогический университет имени Февзи Якубова)
Аннотация. Материалы, обнаруженные в самое последнее время в Российской государственной библиотеке в Москве, являются неизвестными для современных исследователей деятельности основателя Бахчисарайского историко-культурного и археологического музея-заповедника (БИКАМЗ) А. Боданинского. В частности, выявлены сведения о больших средствах, которые были выданы У. Бо-данинскому Бахчисарайским вакуфом «Тёле» после окончания Татарской учительской школы в Симферополе, сыгравшие главную роль в его поездке и обучении в Москве в Строгановском Училище Технического Рисования. Новыми в статье являются также материалы, связанные с обращениями У. Боданинского в 1916 году к Таврическому губернатору и в «Общество Охраны Памятников Истории и Культуры» в Петрограде, связанные с намерениями открытия в Бахчисарае этнографического музея. Малоизвестными являются также частые поездки У. Боданинского в Бахчисарай в 1915-16 годы, когда он создавал из местной молодёжи «Общество любителей искусства и этнографии», которое сыграло важную роль, в том числе материальную, при официальном открытии Бахчисарайского музея этнографии в 1917 году, ибо все члены многочисленного общества ежегодно вносили определенную плату в деятельность музея.
Ключевые слова: Бахчисарайский музей, Усеин Боданинский, Памятники истории и культуры крымских татар.
Для цитирования: Керимов И.А. Усеин Абдуррефиогълу Боданинский (1877-1938) хусусында белли олмагъан малюматлар // Крымское историческое обозрение. 2022. Т. 9, № 2. С. 137-148. DOI: 10.22378/kio.2022.2.137-148
Сведения об авторе: Керимов Исмаил Асанович - доктор филологических наук, профессор, директор Научно-исследовательского института крымскотатарской филологии, истории и культуры этносов Крыма Крымского инженерно-педагогического университета имени Февзи Якубова (295015, Учебный пер., 8, Симферополь, Российская Федерация); ведущий научный сотрудник Крымского научного центра Института истории им. Ш. Марджани АН РТ (420111, ул. Батурина, 7А, Казань, Российская Федерация); alimes@mail.ru
Unknown materials about
Usein Abdulrefioglu Bodaninsky (1877-1938)
Ismail Kerimov
(Marjani Institute of History of the Tatarstan Academy of Sciences;
Fevzi Yakubov Crimean Engineering and Pedagogical University)
Abstract. The materials discovered recently in the Russian State Library in Moscow are unknown to modern researchers of the activities of the founder of BIKAMZ A. Bodaninsky. In particular, information about the large funds that were issued to Bodaninsky by the Bakhchisaray vaqf "Tole" after graduating from the Tatar teacher's school in Simferopol, which played a major role in his trip and training in Moscow at the Stroganov School of Technical Drawing. New in the article are also materials related to the appeals of U. Bodaninsky in 1916 to Taurida Governor and also "Society for Protection of Historical and Cultural Monuments" in Petrograd, related to the intentions of opening an ethnographic museum in Bakhchisaray. Also little known are the frequent trips of U. Bodaninsky in 1915-1916, when he created the "Society of Lovers of Art and Ethnography" from local youths which played an important role, including material, at the official opening the Bakhchisaray museum in1917, because all members of a large society annually contributed a certain fee to the activities of the museum.
Keywords: Bakhchisaray museum, Usein Bodaninsky, monuments of history and culture of the Crimean Tatars.
For citation: Kerimov I.A. Unknown materials about Usein Abdulrefioglu Bodaninsky (1877-1938). Krymskoe istoricheskoe obozrenie=Crimean Historical Review. 2022, vol. 9, no. 2, pp. 137-148. DOI: 10.22378/kio.2022.2.137-148 (In Crimean Tatar)
REFERENCES
1. Muftizade I. Idaree mektyup [A letter to the department]. Terdzhiman. 1913. noyabr' 6. (In Crimean Tatar)
2. Muhbir. Zagovoriv o dobrom dele. [Talking about a good deed]. Ter-dzhiman.1892. 25 oktyabrya (In Russian)
3. Muhbir. Alushtada olmysh kezinti faidesine [About benefits of walking in Alushta]. Terdzhiman. 1916. No. 175. avgust 14. (In Crimean Tatar)
4. Musaeva U.K. Narodnyj uchitel'. Dokumental'nyj ocherk deyatel'nosti vydayushchegosya krymskotatarskogo prosvetitelya Useina Bodaninskogo [Folk teacher. Documentary essay about activities of outstanding Crimean Tatar educator Usein Bodaninsky] Pod red. A.A. Nepomnyashchego. Simferopol: OAO "Simferopol'skaya gorodskaya tipografiya". 2007. 240 p. (In Russian)
5. Ak"chok"rak"ly O. Ressam Usein efendi Bodaninskij [Artist Usein efendy Bodaninsky] Terdzhiman. 1915. No. 271. dekabr' 11. (In Crimean Tatar)
6. Muhbir. Usein efendi Bodaninskij [Usein efendy Bodaninsky]. Terdzhiman. 1916. No. 101. majys 5. (In Crimean Tatar)
7. Ajvazov A.S. Bag"chasarajda "Asar-i-Atik"a Hamileri Dzhemieti" teshkil' me-selesi [To the question of founding "Asar-I Atik'a Hamileri Dzhemiety" in Bakh-chisaray]. Terdzhiman. 1916. No. 105. majys 12. (In Crimean Tatar)
8. Muhbir. K"yrymda musul'man hastahanesi hak"k"ynda idzhtima [About possibility of having Muslim hospitals in the Crimea]. Terdzhiman. 1916. No. 119. iyun' 2. (In Crimean Tatar)
9. Muhbir. Bag"chasaraj. Ressam Usein Bodaninskij dzhenaplary...[His highness the artist Usein Bodaninsky...]. Terdzhiman. 1916. No. 142. iyul' 1. (In Crimean Tatar)
10. Bir yalybojlu. "Asar-i-atik"a ve millij sanaji-nefiseji himae dzhemieti" achyladzhag"y munasebetile[ In connection with opening of society "Asar-I atika ve millij sanaji nefiseji himae dzhemiety"]. Terdzhiman. 1916. No. 191. sentyabr' 4. (In Crimean Tatar)
11. Muhbir. Tatar sanaji mektebi [Tatar School of Art]. Terdzhiman. 1918. No. 10. fevral' 2. (In Crimean Tatar)
About the author: Ismail A. Kerimov - Dr. Sci. (Philology), Professor, Director of the Scientific Research Institute of the Crimean philology, history and culture of the Crimean ethnos, Fevzi Yakubov Crimean Engineering and Pedagogical University (295015, Uchednyy lane, 8, Simferopol, Russian Federation); Leading Researcher of the Crimean Scientific Center, Marjani Institute of History of the Tatarstan Academy of Sciences (420111, Baturin Str., 7A, Kazan, Russian Federation); alimes@mail.ru
