CC BY
11ДРАМАТУРГИЯ - ДРАМАТУРГИЯ
Керимова Севиль Асановна1
ИНКЪИЛЯП АРФЕСИНДЕКИ КЪЫРЫМТАТАР ТЕАТРОДЖЫЛЫГЪЫ УЗЕРИНДЕ ЯНЪЫ КЕШФЛЕР
УДК: 070:82-92.792.2
Новые находки сценических работ на крымскотатарском языке в дореволюционный период
В статье на основе новых материалов исследовано развитие крымскотатарского сценического искусства и драматургии в преддверии Октябрьской революции 1917 года. Представлены оригинальные постановки, которые происходили в Бахчисарае, Акмесджите, Карасубазаре, Алуште и других регионах. Обозначены имена актёров и драматургов, которые ранее не были известны исследователям. Делается вывод о том, что именно активизация работы в области национального искусства и становление кадров при Временном правительстве в 1917 году явились основой «крымскотатарского гуманитарного ренессанса» в 1920-е годы.
Ключевые слова: крымскотатарская драматургия, сценическое искусство, доревоюционный период, гуманитарный ренессанс
New finds of scenic works in the Crimean Tatar language in the pre-revolutionary period
The article highlights the development of the Crimean Tatar stage art and playwriting on the eve of the October Revolution of 1917 on the basis of newly discovered materials. Original productions played in Bakhchisaray, Akmesdzhit, Karasuvbazar, Alushta, and other regions presented. Unknown to researchers before names of actors and playwrights revealed. Just the activation of work in the field of national art and the formation of personnel under the Provisional Government in 1917 were the basis of the "Crimean Tatar humanitarian renaissance " in the 1920s.
Keywords: Crimean Tatar dramaturgy, performing arts, pre-revolutionary period, humanitarian renaissance
Дженктен сонъки кьырымтатар мевзуатында ильмий чалышмалар талиль этильсе, бирден козь огюне сенелер боюнджа девам эткен эки девир пейдалана. Биринджиси, «Озьбекистан деври»дир ки, бу девир, бир тарафтан, советлер деври сайылып, къатты цензура олгъанындан, истенильген шей басыламаз эди. Экинджи тарафтан, тедкъикьатчыларнынь элинде керекли материаллар ёкь олып, оларнынъ тапылмасы да гьает зор эди. Меселя, бугуньде белли профессорымыз Исмаил Керим чокъ дефалар Москвагьа барып, о замандаки В.И. Ленин адына меркезий кутюпханеде чалышмагьа огьрашса да, паспортында «прописка»сы олмадыгьындан, ве отельге ерлешмек ичюн махусус бакьанлыкь ёлланмасы кереклигинден, Москвада ятакь булмасы чокь зор олып, вокзалларда сюйрекленип юре эди. Ве бундан да гьайры, кьырымтатар мевзуатына багьлы малюматлар чокьусы ачыкьта булунмайып, эр вакьыт «начальниклерге» чешит ариза ве риджанамелер язып чокь зорлукьларле бир шейлер булуна билир эди. Кьырымнынь кутюпханелери ве архивлери исе, кьырымтатары ичюн бус-
1 Керимова Севиль Асановна, кандидат искусствоведения, доцент, старший научный сотрудник НИИ крымскотатарской филологии, истории и культуры этносов Крыма ГБОУВО РК КИПУ имени Февзи Якубова (Симферополь, Крым). E-Mail: svetasevil@mail.ru
бутюн къапалы алда эдилер. Бу сонъкисининъ чокъ ачыкъ мисали уньлю ве Озьбекистанда авторитетли язарларымыз Ш. Алядин ве Э. Шемьи-заде бераберликте 1958 сенеси, яни партиянынъ ХХ съездинден сонъ, Къырымгъа келип Багъчасарай кутюпханесинде чалышаджакъларында, милиция тарафындан тутукъланып аджеле суретте Къырымдан кенар этильдилер ...
Экинджи девир «Авдет деври»нен багълыдыр ки, бу девирде советлер де энди ёкъ кибилер... Ич олмадым, Къырымдаки граждан архивлери ве кутюпханелери шу джумледе къырымтатары ичюн ачыкъ олгъаны ве цензура меселеси артыкъ о дереджеде къатты олмадыгъындан, тедкъикъатлар ичюн вазиет ве имкянлар бам-башкъалаштылар. Ве сонъ вакъытлардаки эйихаллардан - проф. Исмаил Керим Москванынъ меркезий кутюпханесинден, Санкт-Петербургдаки Русие миллий кутюпханесинден ве дигер, шу джумледе гъарп архив ве кутюпханелеринден [Гъарп архив], кетирген бинъ-бир тюрлю материаллары (бинълердже саифе фотокопиялары) къолумызда чокъ зенгин бир эски матбуат коллекциясы булунмакътадыр. Иште, шу чокъусы янъычыкъ булунгъан малюматларны эскилери иле къыяс эткенде, эски араштырмаларымызнынъ ильмий левхасы даа зияде айдынлана, конкретлеше ве ильмий исбатлар джихэтинден даа да мухкем олгъаныны коремиз.
Эм де шимдичик хронология меселесини ортагъа алсакъ, 1916 сенесининъ олайлары мейдангъа чыкъмакъта ки, о заман Биринджи джихан савашы дюньяны сарса да, Къырымдаки миллий медений дурум даа «нефес алып» аякъта тургъаныны козетемиз. О вакъытта халкъымызнынъ иджат эткен джемиет-хайриелери укюметнен ич бир шекильде багълы олмайып, халкъ кенди арасында малийе (акъча) топлайып чешит медений тедбирлер, «Шаркъ акъшамлары», Къурбан ве Ораза байрамлары тёренлерини кечирдигинде, илери ве фааль генчлер мытлакъ сахна санатыны да ишлетмеге огъраша эдилер. «1916 сенеси август 27-де ялыбою джемиет хайриеси менфаатына олмакъ узьре шехэр багъчасында джемиетин идареси тарафындан «Шаркъ акъшамы» тертип идилип, гъает муваффакъиетли кечмиштир. «Шаркъ акьшамы»нда...татар хаятындан «Къырымда бир гидже» нам джанлы левха сахная къонулды. Татар музыкасы миллий хавалар тегъанни идиюр (йырлана) ве сахнада татар генчлери ве къызлары миллий эльбисе (урба) иле кийинмиш олдукълары халда йэкдигерине (бири-бирине) мухаббет ве сухбет идиюрларды. «Шаркъ акъшамы»нынъ 3-нджи къысмыны миллий татар оюнлары тешкиль идиюрды» [Мухбир, 1916]. «Терджиман»нынъ бу хаберинден корюне ки, 100 сене эввель де къырымтатар генчлери сахна оюнларына авес эдилер. Ама, эмиет берильген олса, «миллий урбалар» о заманда энди тек сахналарда корюне эдими? Эр алда там бильгенимиз киби, 1920-нджи сенелери, яни Къырымда советлернинъ акимиети пейдалангъанда, къырымтатар эркеклерининъ миллий къалпакълары озь ерини энди фуражкаларгъа берип башлагъан эдилер. Бу шей эм де шу девирнинъ фотоларында корюнмектедир.
Эбет, о заманлары, бугуньдеки киби, сахна санатына драматургия эсерлери етишей эди. Онларнен къалемтутарларымыз шекилленмекте олса да, эдебиятнынъ бир чокъ жанрларына эль токъунылмай эди. Бильгенимиз киби, къырымтатар миллий омрюне багъышлангъан ве къырымтатар тилинде язылгъан биринджи пьеса С.А.Озенбашлынынъ 1897 сенеси язгъан «Оладжагъа чаре олмаз» пьесасы эсап этильмекте... Сонъундан ишбу пьеса айры китапчыкъ шеклинде 1901 сенеси нешир этильген эди.
Авескяр къырымтатар театро дестелери пьеса етишмемезлигини табий суретте терджимелер иле компенсация япа эдилер ки, 1917 сенеси Къарасув генчлери сахнада ойнамакъ ичюн тюркчеден, яни Ахмет Митхат эфендининъ «Севда къоркъунчлары» нам пьесасыны алгъан эдилер. Къыскъа хаберде ойнагъан актёрлар, декорациялар, костюмлер, яратылгъан образлар анълатылмаса да, хамиетли (ветанпервер) бир генчнинъ, яни Усеин Мустафаевнинъ кенди тарафындан махусус бир чичек букети азырлагъанындан гъайры, театрден къазанылгъан 52 рублени Къарасув Мусульман Комитети сандыгъына быракъкъаны къайд этильмекте [Мухбир (а), 1917].
Инкъиляптан эввельки театримиз акъкъында базы къыскъа хаберлер о къадар къыйметли ки, эки-учь сёзнен баягъы буюк миллий-медений левхалар ачмакъталар. Не къадар да олса, театроджылыкъта авескяр сайылгъан генчлер арасында буюк актёрлыкъ истидатына малик олгъанлар булунгъаны акъкъында базы адий сейирджилер биле хабер этмектелер. Эм де сёз «татар тарихини джанландыргъан пьесалар» хусусында кетсе, меселе къат-къат
джиддийлешмекте. Эм де, айрыджа къайд этмели ки, бугуньде театримизнинъ тарихи акъкъында парчаларда адлары ич де белли олмагъан худаинабилер (самородки) хусусында сёз юрютильмекте. Хаберлерден биринде айнен шу ашагъыдакилер къайд этильмекте: «Акъмесджитте... миллий сахнада татар тарихини джанландыран ве хакъикъий артистлерден феркъ олунмаяджакъ дереджеде роллерини ифа идуп буюк бир санаткярлыкъ косьтерен ялыбойлу Айше, Халиме ханымлара, мешхур оюнджыларымыздан Хайри (Эмирзаде) эфендие... тешеккюр итмейи кендиме бир вазифе ад идиюрым. Бейтулла Арифов» [Арифов, 1917].
Акъмесджитте бу тедбирден эввель даа бир аджайип «Миллий акъшам» тертип этильген эди. Эм бу акъшамгъа Багъчасарайдан Мамут Рефатовнынъ хоранта ансамбли келип сантыр, саз, уд ве гитара киби индже саз такъымындан ибарет олып концерт бергенлер [Мухбир (Ь), 1917]. Анълагъанымызгьа коре, Къырымнынъ чешит шеэр ве койлерде тертип этильген «Татар акъшамларында» сахна оюнларындан гъайры, концертлер де берильмекте эди ки, татар ансамбллерининъ энъ мешхуры багъчасарайлы Мамут Рефатовнынъ ёлбашчылыгъында чалышкъан хоранта ансамбли эди. Эм де онынъ огълу Асан Рефатов 1930-нджы сенеси Бакуда консерватория битирип 1934 сенесинден Азербайджан Композиторлар шурасынынъ биринджи реиси ола!!! 1932 сенеси исе онынъ экспедицияда топлагъан «Къырымтатар йырлары» адлы джыйынтыгъы нешир олуна.
Сахна оюнлары тёренлери ве миллий-эдебий акъшамлар эсасен буюк байрамларда, даа догърусы Къурбан байрамы куньлеринде, кечирилип ялынъыз шеэр дегиль, эм де кой халкъыны джельп этмекте эдилер. Бойле вакъытлары Багъчасарай шеэр думасынынъ 100 кишиге якъын сыгъдыргъан залы киралана, сахна яраштырыла ве тедбирге атта билет де сатыла эди. Меселя, газет языларындан биринде бойле хабер берильмекте: «Багъчасарайда эдебият акъшамы. Багъчасарай ве дживар къариелер (койлер) муаллимлер иттифакъы Къурбан байрамы 2-нджи акъшамы шехэр думасы залында эдебият акъшамы япмая къарар вирдилер. Ишбу акъшам ерли хавескяр генчлер тарафындан бир-ики оюн косьтериледжек, шиирлер окъунаджакъ ве миллий оюнлар ойналаджакътыр. Билетлер Али Тарпи магъазасында ве Джемиет-хайрие къавесинде сатылыюр...» [Мухбир (с), 1917].
Шу вакъытларда эм де эдебий джереянларны, неширлерни, шу джумледе драматургия эсерлерини, анълаткъан, атта талиль эткен, парчалар да растлана. Парча муэллифи классигимиз, мешхур языджы ве алимимиз Осман Акъчокъракълы олдугъандан, къыскъа язысында бир чокъ миллий-медений меселелерни котерип огьлерини ача, шекилленме ве илерилеме джереянларыны анълата: «Енъи эсерлер. «Йыкъынтылар астындан». Инкъиляп, инкъиляп иле, эдебият кенди ёлуле кидиюрлар. Шукюрлер олсун ки, бугунь элимизде булунан сиясий къувветлер чалыштыгъы киби, эдебий къувветлеримиз ишлиюр. Сонъ айлар зарфында енъи миллий шаирлеримиз бизе бир хайли шиир багъышладыкълары киби, эхли-къалем генчлери бир къач махсул-ы-эдебий вирдилер. Хэм де бугунь язылан эсерлер йыллар иле таб ве нешрини беклемиюр, бир тарафтан таб олунмакъта, дигер тарафтан театро сахналарында темаша итдирилиюрлар. Ишбу хурриет айлары ичинде Асан эфенди Чергеевин «Такъдир», Джемиль Керменчиклининъ «Достларыма», Абдульгъафар Шерфеддиновнынъ «Бала йырлары» нам шиир дефтерлерини, Усеин бек Болатуковнынъ «Айше ханым» нам эсерини матбу оларакъ ве сахнада корьдик. Сеит Абдулла Куркчининъ «Сюнгю чувала сыгъмаз» эсерини сахнада корьдик. Джафер эфенди Сейдаметнинъ «Миллий дуйгъу»сы «Миллет»те басылды. Эдип Челебиджихан эфендининъ ве генчлерден Умер Фехми эфендининъ (Умер Ипчининъ) мютесир (пек тесирли) шиир парчаларыны сахнеде ишидиюрыз. Бу енъи миллий эдебиятымызда Амет эфенди Озенбашлынынъ «Йыкъынтылар астындан» намындаки театро эсери де къошулды. «Йыкъынтылар астындан» татар хаятынынъ енъи девре кирдиги куньлерден бир сахифесини тасвир идиюр. Лисаны адета къонуштыгъымыз табий шиве узьре олдугъындан, керек окъундыкъта, ве керек сахня къонуладжагъы вакъыт, эсердеки типлерин (кишилерин) базы аджыныкълы ве базы кулюнчли халларыны тамамы иле косьтере билиюр. Бу нев эсерлерин къыйметли олмасынынъ биринджи себеби де шудыр ки, муайен (белли) бир асырда бир миллетин шивеси, тарз-ирадеси ве эхвал-рухиесини айнен киби косьтериюр. Меселя, руслардан Гоголин «Эвленмек» нам мешхур эсерини озь къырым шивемизе 1902 сенеси терджиме итмиш идим. Енъи генч къалемлеримизе хайырлы (олсун), даха чокъ эсерлерини беклериз» [Акъчокъракълы, 1917].
Инкъиляп арфеси сахна санаты ве драматургиясыны козьден кечирип тедкъикъ эткенде, даа бир озьгюн левхагъа огърадыкъ. Яни къырымтатар ханымлары тарафындан иджат этильген яхут бир де бир материал узеринде ишленип азырлангъан драматик эсерлер меселеси. Табий, бу ал бутюн мусульман дюньясында чокъ сийрек олгъанындан гъайры, ханымлар тарафындан насыл да олса, язы язмакъ, сахна оюнларында иштирак этмек ве аслында кенди башына яшагъан азбарындан тыш чыкъмакъ - чокъ зор меселелерден сайылдыгъы заман эди ки, буны даа терендже огренмели ве тедкъикъ этмели. Биз тапкъан левхада насылдыр А.Челебиева адлы ханым тюрк мухаррирлеринден Фатма Алиенинъ эсеринден файдаланып, къырымтатарджа «Хаст анахтары» адлы драмагъа мейдан бере... Хабер айнен бойле берильмекте: «Акъмесджитте генчлер тарафындан «Ешиль ада» намында бир театро хэйети тешкиль олунмыш. Бу хэйет бу куньлерде османлы мухаррирлеринден Фатма Алие ханымын «Мухазарат» («Блокада») нам эсерлеринден икътибас идилерек (файдаланаракъ) «Хаст анахтары» намыле А.Челебиева ханым тарафындан къалеме алынмыш драмайы ойнамыш» [Мухбир (а), 1917].
Корьгенимиз киби, инкъиляп арфесинде, илля ки, чар режими авдарылгъанындан сонъра, дюньяны дехшетли саваш саргъанына ве бутюн орталыкъ виранелерге дёнгенине бакъмадан (икътисадий ве маддий бербатлар), къырымтатар халкъы рухтан тюшмейип, миллий-медений кучьлерини топлап, эм медениетини, эм ильмини, эм де ичтимаий (хайрие) ишлерини сагъламлаштырмагъа тырышкъандыр. Тапылгъан сонъки материаллар шуны косьтере ки, къырымтатар миллий-медений дурумы вира илерилемекте, инкишаф этмекте ве къоюлашмакъта эди. Тамам буларнынъ нетиджесинде бугуньде баягъы огренильген 1920-нджи сенелерининъ миллий-медений ренессансы да эсас булгъандыр.
Эдебият:
1. Гъарп архив ве кутюпханелеринде булунгъан къырымтатар мевзуатындаки материалларнынъ
джедвели айры китап олып чыкъкъан эди / Керим И.А. Гъарбий Авропанынъ архив ве кутюпханелеринде къырымтатар мевзуаты. Монография. Белгород: Константа, 2017. 176 с.
2. Мухбир. Ялтада «Шаркъ акъшамы» // Терджиман. 1916. №193. Сентябрь 7.
3. Мухбир (а). Къарасувда «Татар акъшамы» // Терджиман. 1917. №103. Майыс 17.
4. Арифов Б. Идарее мектюп // Терджиман. 1917. №116. Июнь 8.
5. Мухбир (Ь). «Татар акъшамы» // Терджиман. 1917. №111. Майыс 31.
6. Мухбир (с). Багъчасарайда эдебият акъшамы // Терджиман. 1917. № 183. Сентябрь 14.
7. Акъчокъракълы О. Енъи эсерлер. «Йыкъынтылар астындан» // Терджиман. 1917. № 197. Октябрь 11.
8. Мухбир (а). Акъмесджитте «Ешиль ада» намында театро хэйети // Терджиман. 1917. № 241. Декабрь 27.
