CC BY
6Литература и язык
УДК 82 DOI: 10.22378/кю.2021.2.73-82
100 йылдан берли эль токъунылмагъан чалышмалар
Исмаил Керим
(Татарстан Джумхуриети Илимлер Академиясы, Ш. Марджани адына тарих Институты; Къырым муэндислик ве педагогика университети)
Анълатма. Къырымтатар языджыларынынъ ХХ асырнынъ биринджи чейрегине аит бир сыра эсерлери земаневий тедкъикъатчыларымызгьа белли дегильдир. Чюнки бу эсерлер озь вакътында козьден къачырылып, сонъун-дан исе булунмасы ве ишленмеси къыйын олдугъындан, назар-дикъкъаттан кенарда къалдылар. Иште, бойле эсерлерден базылары А.Хильмийге аит-тир. Онынъ терджиме-и-алы да аля кереги киби огренильмеди. Макъаледе 1914-1917 сенелерине аит аяты ве чалышмалары хусусында сёз юрютиль-мекте. Тедкъикъаткъа инкъиляптан эввельки матбуат, архив материаллары ве языджынынъ замандашлары тарафындан язылгъан хатыралар джельп этиль-гендир. Имсаль сыфатында онынъ 1917 сенеси язылгъан «Инкъилябий асаби-елер» парчасы алынды. Неширге азырларкен, араб язысындан транслитераци-ясы ве арабча-фарсидже алынмаларынынъ глоссарийси къошулгъандыр.
Анахтар сёзлер. ХХ асырнынъ башындаки къырымтатар классикасы, янъы тедкъикъатлар ве бугуньде белли олмагъан эсерлер, А.Хильмийнинъ бедий асабалыгъы.
Меселенинъ актуаллиги. Языкълар олсун ки, чешит сиясий меселелер ве кечмиштеки вахший зорбалыкъ ве сюргюнлер къулланымларындан до-лайы, къырымтатар эдебиятынынъ земаневий тедкъикъатларында бир чокъ къаранлыкъ, бельгисизлик нокъталары булунмакътадыр. Буларны, къысмен олса да, кидермек макъсадыле сонъ сенелерде Москванынъ меркезий кутюп-ханесинде махсус чалышмалар кечирдик. Иште буларнынъ нетиджеси ола-ракъ дженктен эввельки тек-тюк язарларымызнынъ бугуньде билинмеген
эсерлери матбаа юзюни коре башладылар. Шулардан бириси де - Абдуль-хаким Аджы Ариф огълу Хильмийдир. Онынъ тек 1914 ве 1917 сенелери арасындаки омрю ве чалышмаларына козь ташлайыкъ.
Эсас къысым. 1914 - 1917 сенелери А.Хильмий нелер язды ве къайда ча-лышты? А.Хильмийнинъ «Зынджырлы» ве дигер медреселернинъ вазиетини огренерек, март ве апрель айларында «Терджиман» газетасында тасильдеки ислях (ыслах, реформа) ишлери иле багълы учь макъалеси нешир этиле [1]. 1914 сенеси биз А.Хильмийни энди Тавдаир коюнинъ медресесинде мудер-рис (баш оджа) сыфатында коремиз.
Бу малюматны Джафер Сейдамет бойле къайд эткендир: «1914 сенеси Акъмесджитте Вели Ибраимов чалышкъан Вамегин деген зенгиннинъ къа-весинде къырымтатар миллий арекетининъ иштиракчилери гизли топланты кечирелер. Топлантыда Тавдаир медресесининъ мудерриси Абдульхаким Хильмий, Номан Челебиджихан, Амет Шукрю ве даа бир чокъ адамлар бу-лунгъандыр» [2, с. 124].
А.Хильмий макъале язаркен, къанатлы сёзнинъ, бедиетнинъ башары-лы, муваффакъиетли бир темсильнинъ, образнынъ кучюне гонъюль бере ве яваш-яваш кендиси де къалемини бедий эсерде сынамагъа башлай. 1914 сенеси ноябрь 1-де «Терджиман» газетасында онынъ Биринджи джихан са-вашы мевзусында «Чубарым, балам» серлевалы икяеси дюнья юзюни коре. Мундериджесинде адий бир къырымтатар къадынынынъ огълу - Чубарны дженктен къайтмасыны беклегени ве, нихает, бир кунь Чубар, башы ве эл-лери бинтнен сарылы алда, эвге къайтып, ана ве огъул бири-бирине къавуш-къанлары акъкъында тариф олуна. Меракълы шей, тамам 10 йыл сонъра, 1924 сенеси, белли языджымыз Умер Ипчи айны сюжетте «Зейнеп тийзе» икяесини яза. Лякин Ипчининъ икяесинде дженкнинъ инсан табиатына терс-лиги ве драматизми даа да зияде къоюлаштырылып, сюжетнинъ девамында эсас къараманларнынъ (ана ве огъул) къавушкъанларындан сонъ, анасынынъ юречиги хорлангъан ве ипрангъан, огълу исе яралангъан алда экенлер, эр экиси де чокъкъа бармадан эджель ястыгъына яталар.
А.Хильмийде бедий эсер язмакънынъ ильки теджрибеси зарарсыз олып, юкъарыда къайд эткенимиз киби, язгъан макъалелерини биле аджайип бедий темсиллерле яраштыра. Мисаль оларакъ «Зынджырлы»е хитабен (1913) ве «Къадынлыкъ меселеси» (1915) парчаларыны козь огюнде тутарсакъ. Ве тамам юкъарыда метинлерини косьтердигимиз «Бомбардуман» (1916) фельетоны ве «Сен де, кет» шиири ишбу бедийликнинъ, усталыкъ ве истидатнынъ ачыкъ тимсаллеридир.
Шу сенеси, яни 1915-те, бугуньде биз ич эшитмеген ве бильмеген бир сыра иджаткярлар, къалем теджрибелерини «Терджиман»гъа кондере эдилер ки, шу парчалар матбаа юзюни корьмеселер де, бедий «истидатлары такъдир этилип» олар акъкъында сыра иле хаберлер басылдылар. Меселя, Ялтадан
газетагъа нешир ичюн «роман» кондерген Х. Ремзиге «романджыгъынъыз ахлякъий олмадыгъындан, дердж идемееджегиз. Истидадынъызы такъдир идериз» [3]. Кезлеведен бириси русчадан терджиме эткен «Козь яшлары» намындаки эсер акъкъында редакция бойле джевап бермекте: «Бойле хикя-еджиклери меджмуалара коньдерсенъиз, эйи олурды, биз басамаяджагъыз» [4]. Яни А. Хильмий ве онъа бенъзерлернинъ эсерлери о вакъытта Къырым юзюнде екяне олгъан «Терджиман»да шиддетли рекъабетлерден кечмеге меджбур эдилер.
Эм де сиясий, тербиевий, маариф фаалиетини девам эттиргени, тарафы-мыздан сонъ афталарда пейда эткен материаллардан да корюнмекте. 1915 сенеси Зынджырлы медресесининъ мудерриси Абибулла салис («Учюн-джи Абибулла») рахметли олгъан сонъ, янъы мудеррис сайлавында буюк-тен-буюк меселелер мейдангъа чыкъкъан эди. Ахыры-сонъу Къырымнынъ козьге корюнген интеллигенциясынынъ буюк бир къысмы 1916 сенеси март 12-де Зынджырлынынъ буюк бинасында топланаракъ, кениш мушавере ке-чирдилер. О ерде Зынджырлынынъ исляхатынен (реформасынен) багълы 24 кишиден ибарет комиссия сайланды. Иште о комиссиягъа А.С.Айвазов, О.Акъчокъракълы, Н.Челебиджихан, И.Леманов ве дигерлеринен берабер А. Хильмий де сайлангъан эди [5]. Бу ерчикте айрыджа къайд этмели ки, И.Леманов о вакъытта Русие Девлет Думасындаки мусульман фракциясы-нынъ серкятиби эди [6]. Яни исляхат комиссиясынынъ девлет мыкъясында кучю бар эди.
Акъикъатперест А.Хильмий деврининъ энъ кескин даваларына киришип, кенди фикрини сербест сёйлемеге икътидарлы эди ки, Багъчасарай шеэр га-лавасы Сулейманбек Крымтаев ве «Терджиман» мухаррири А.С.Айвазов ара-сында Зынджырлыгъа мудеррис тайин этмек меселесинде дава чыкъып, атта А.С.Айвазовны дуэльге чыкъармакъ истегини бильген Хильмий, бу ишке бирден бойле сесленди: «... Эгер бир ташы биле истерсем, Зынджырлыя му-деррис япа билирим - диен Сулейманбек дженаплары Зынджырлыя баш му-деррис интихаб-ы-алений (ачыкъ сечимлерде) Къырым эфкяр-ы-умумиесини (джемаат фикрини) танымакъ суретиле иши халь идерсе, онынъ бу харекети-ни генчлер бир фазилет итмее бутюн къальблериле хазырдыр. Шайед (эгер) эввельки нокъта-и-назарда себат къалырсе (вазгечмесе), генчлерден бири эмеллери огърунда Сулейманбек тарафындан атыладжакъ къуршуна къур-шун иле мукъабеле итмее (къаршылыкъ бермеге) меджбурдыр» [7].
Биринджи джихан савашы не къадар созулыр исе, Русиеде, шу джумледе Къырымда, о къадар да эрзакъ къытлыгъы, куньделик керекликлерин ёкъ-лугъы, ишсизлик меселелери къоюлаша. Табий, кенди зенаатына келишкен чалышмалардан къачынмагъа сыра кельмезди. 1916 сенеси Акъмесджитте «Коммерческий мектеп»те 15-тен зияде къырымтатар талебеси булунды-гъындан, мектеп мудириети къырымтатарджа тиль ве мусульман дини дерс-
лерини кечирмек ичюн А. Хильмийни давет эте. А. Хильмий шу арада ха-типлик вазифесинде булунса да, ишбу даветни мемнуниетле къабул этип мектепте чалышмагъа башлай. Бу мектепте афтада 4 саат дерс кечире. «Тер-джиман» газетасы мезкюр олайны бойле изаат эткен эди: «Бу гузель ише севинмемек, бунынъ девамына чалышмамакъ мумкюн дегильдир. Факъат мектеп идареси тарафындан верилен уджрет (айлыкъ) тедрисие нисбетен аз олдугъындан, муаллим хаятыны темин меселеси мектепте чоджукълары окъуян бабаларын бир вазифесидир. Эгер тиджарет мектебинде окъуян та-лебелере бабалары русча иле берабер дин ве диль дерслерининъ де окъу-тылмасыны джидден арзу идерлерсе, бу хусуста озь араларында сёйлешуп анълашаджакъларына шупхэ итмек истемеюрыз. Меселе мухимдир, миллий ве ичтимаий буюк бир эхэмиете хаиздир (эмиетке маликтир)» [8].
А. Хильмийнинъ аяты ве иджадыны огренгенде, онынъ газетаджылыкъ ишине айрыджа дикъкъат этмели. О, буюк бир газетаны биле идаре эте би-леджегине эмин олып, та 1916 сенеси, А. С. Айвазов миллий меселелер бо-юнджа Москвагъа кеткенде, оны бир къач айгъа гъает шерефли ве дюньяджа популяр олгъан «Терджиман» газетасынынъ баш мухаррири вазифесине тай-ин эткен эдилер [2, с. 152]. Ве узун олмагъан бир арадан сонъ, яни 1917 сене-си июнь 30-дан башлап, А. Хильмийнинъ мухаррирлиги алтында «Къырым оджагъы» адлы газета чыкъарылмагъа башлай. Ишбу газетанынъ наширлери (издатели) Мустафа Къуртмеметов (Мустафа Къуртий) иле Вели Ибраимов эдилер. Аман-аман айны вакъытта, даа догърусы июнь 27-ден А. С. Айва-зовнынъ баш мухаррирлигинде «Миллет» (къырымтатар миллий парламен-тосынынъ нашир-и-эфкяры) ве бир айдан сонъра да Халиль Чапчакъчы ве Али Боданинскийнинъ идаресинде русча оларакъ «Голос татар» газеталары чыкъмагъа башладылар.
Нетиджелеме. Аслында 1917 сенесининъ февраль инкъилябы Русиеде яшагъан халкъларгъа баягъы сербестликлер кетирди. Вазиеттен файдаланып «инородец»лер озь миллий омюрлериндеки кетишатны сагълам рельслер узерине къоймагъа арекетлер этип башладылар. Ама бу кетишат эр вакъ-ыт тюз дегильди. Онынъ эгри-догъру ёлларыны ачыкъламагъа тутунгъан А.Хильмий 1917 сенеси «Алтайлы» махлясы алтында ашагъыдаки макъале-лерини бастыра. Макъалелернинъ толу вариантларыны берип, къайд этемиз ки, мезкюр парчалар 100 йылдан сонъ биринджи дефа матбаа юзюни корь-мектелер.
АЛТАЙЛЫ (ХИЛЬМИЙ) ИНКЪИЛЯП АСАБИЕТЛЕРИ
8 март акъшамы Акъмесджит джемиет-хайриеси азалары тесадуфен ид-жтимада (топлашувда) бир къач затле бирликте бугуньки вазиети музакере идерек, кенди кендилерини интихап ве тевкиль (сечим этип векиль сайла-
макъ) иле кенди кендилеринден бир Комитет тешкиль идуп ашагъыдаки къа-рарлары иттихаз иттиклери (мейдангъа чыкъармалары) ишидильмишти:
1. Къырымтатарларына хитабен Комитет намындан бир беяннаме нешир итмек.
2. Якъын заманда бутюн Къырымдан адамлар чагъыруп умумий бир ид-жтима (топлашув) япмакъ.
3. 9 мартта, яни иджтима сабахы, къырымтатары намындан Вакъыф Ко-миссиясынынъ бутюн ишлери джебрен (зораки шекильде) терк иттирдиктен сонъра, Комиссия бинасыны килидлеюп анахтарларыны Губерна Комиссары господин Харченкоя теслим итмек.
Комитет о гиджеси бу къарары хэр кестен сакъламая къарар вермиш исе де, икинджи куню бу къарар бутюн шехире дагъылмыш ве инкъилябын бу ильк семереси сабырсызлыкъле бекленмишти. Факъат о куню Комитет та-рафындан хич бир тешеббюс япылмады. Ве бу риджатын (кери дёнменинъ) себеби де о куню ачыкъ аньлашылмады.
9 март акъшамы Комитетин икинджи иджтимасы олды. Бу иджтимада Комитет азаларындан башкъа бир къач хавескяр даха хазыр иди.
Меджлис Вакъыф Комиссиясы меселесини музакере иле ише башлады. Кыпчакский Мустафа мырза, Хусеин мырза Уланов Комитет тарафындан ве-рилен дюньки къарара Губерна комиссары эхалие ихтиятле давет назарыле бакътыгъы, айны заманда енъи хукюмет тарафындан миллий муэссиселере даир бир эмир олмадыгъындан долайы бойле бир муэссисенинъ къапалма-сына разы олмаяджагъы киби, бойле бир харекеттен хусула келен месулие-ти дерахте идемееджеги (усьтюне аламаяджагъы) сёйлендиктен сонъра, бу къарарын иджрасыны муваффакъ бир заман келинджее къадар техир идиль-месини (сонърагъа быракъылмасыны) теклиф итти. Али Баданинский де бу фикре къошулды.
Меджлисте хавескяр сыфатыле булунан А. Хильмий эфенди: Эввеля, бу куннинъ лозунгы шиарий итимат (гувенме) ве векялет-и-умумие олдугъы джихэтле бу ики сыфаты хэнуз олмаян бир Комитетин къырымтатары намы-на хич бир къарар вермее хакъкъы олмадыгъы. Саниен (экинджиден), Вакъ-ыф Комиссиясы бу суретле къапалырсе, билятабий (табий олмадан) онынъ керек архиви, керек хэсабаты муайене олунмаяджагъы (тефтиш этильмеед-жеги) джихэтле, шайед (эгер) илериде хэсапта архивде бир уйгъунсызлыкъ, яхут башкъа бир къаза зухур идерсе, бунынъ месулини булмакъ мумкюн ол-маяджагъыны. Салисен (учюнджиден), Комиссиянынъ 30 - 40 йыллыкъ зе-хирли хаятына къаршы гъалеян итмеен къанларын Комиссиянынъ зарарсыз бир къач айлыкъ омрюне къаршы чошаракъ, хич бир къануны, хич бир эсасы назар-итибара алмадан, онынъ къапатылмасы хакъкъында вердиги къарарла-рынынъ «безтактичный», ёлсуз бир харекет олдугъыны сёйледи.
Доктор Рустембеков Хильмий эфендининъ «безтактичный» сёзюни бу-
тюн меджлиси тахкъир демекле идуп, эгер хатиб бу сёзю ичюн меджлисе къаршы беян-ы-итираз итмезсе, бу тахкъир олунмыш меджлисте артыкъ бу-лунамаяджагъыны арз идерек къалкъты, меджлистен чыкъты.
Меджлис азалары Хильмий эфендининъ бу келимесини «неправильный» димекле тефсир иттилер, Хильмий эфенди де бу келимеден макъсады меджлис тахкъир олмаюп шу мейильде бир акъиде (багълама) олдугъыны тас-дикъ иттиктен сонъра, хэеджан ятышты, доктор бек де меджлисе текрар къо-шулды. Ама меселе йине битмеди.
Рустембек хараретли бир тарз-беянле: Къырымда бугунь ичюн лязим къа-рарлары вереджек бир муэссисе олмадыгъыны, шайед (эгер) кечен сене хаста-хане тешкилине къаршы турулмамыш олса, биз бугунь тешкиль итмиш шу Комитейи йыкъмая чалышмакъ, илериде хастахане йыкъмакъ къабахатындан даха буюк бир джинает димек олдугъыны, шайед бойле бир муэссисе варсе, оны кендилерине косьтермесини Хильмий эфендие теклиф итмекле берабер ики сенеден бери Къырымда яшадыгъындан бойле бир муэссисе варсе, кенди-нинъ мытлакъ ондан хабердар олмасы лязим кельдигини беян итти.
Хильмий эфенди: Къырымда 1 дегиль, 7 - 8 муэссисе олдугъыны ве бу муэссиселер вастасыле итимат (гувенме) ве векялет-и-умумиее хаиз (малик) бир Комитет тешкиль итмек мумкюн олдугъыны ве факъат бу макъсадыны анълатмакъ ичюн кендисине сербестче сёз сёйлемек фурсатыны вермелери-ни меджлистен риджа иттиги ве сёзе де башладыгъы халда, онынъ беянаты мевзунынъ тышында таныларакъ, меманат олунды (мен олунды, къаршы ту-рулды).
Бундан сонъра, кечен меджлисте верилен къарара бинаэн, умумий иджти-магъа (топлашувгъа) кимлер чагърылмалы (?) меселеси музакере олунды.
Хильмий эфенди: Комитетнинъ умумий меджлисин тарз-ы-иджтимасы (топлашувнынъ шекли) хакъкъындаки нокътаи назарыны муваффакъ масла-хат (эмиетли бир шей оларакъ) булмады.
Ве бунынъ неден муваффакъ олмадыгъына, умумий меджлиси не сурет-ле топламакъ лязим олдугъына даир сёзе башлады исе де, Комитет реиси Хуршид Крымтаев, Хильмий эфендининъ сёзлеринден теклиф идеджеги тарз иджтимайы муваффакъ булдугъы халда, бу тарз дюн верилен къарара эсас итибарыле мухалиф (къаршы) олдугъы джихэтле бу хусуста даха зияде сёз сёйлемее мусааде идемееджегини, Комитет азаларынынъ протестоларына истинаден (гувенерек) беян итти. Ве Комитет меджлис-и-умумий иджтимасы хакъкъында шу къарары верди:
25 мартта1 бир февкъульаде (олагъан усьтю) меджлис япмакъ, о меджлисе
1 Ихтар. Ишбу 25 марттаки топлашувда, эввельде Джафербек Рустембеков тарафындан теклиф этильген «Терджиман» нынъ даха васи (кениш ве бол) бир программ иле буюк хаджимде оларакъ чыкъмасы ичюн бир Фонд тесис» этилип, буюк микъдарда пара топлангъан эди.
Къырымын хэр тарафындан о тараф эхалисине фикирлерини тешхис идеби-леджек (сайладжакъ) киби векиллер давет иле онларын ичерисинден Комитете бир къач аза даха сайламакъ [8].
Бундан сонъра, меджлисте Къырым мусульманларына сиясий фыркъа-лардан хангисине къошулмакъ лязим олдугъы музакере олунды. А. Бада-нинский: кадет, социал-революционер фыркъаларына. Рустембек: мусуль-манлыкъ нокътаи назарына муваффакъ енъи бир сиясий фыркъа тешкилини. И. Керимджанов: социал-демократ фыркъасына даир хараретли нутукълар сёйледилер. Ибрахим Фехми эфенди: къырымлыларын бу хусуста бутюн Ру-сие мусульманларынынъ интихап идеджеги (сечеджеги) сиясий меслеге таби олмакъ меджбуриетинде олдугъы джихэтле Комитете бу меселее даир бугунь бу къарары иттихаз итмек (мейдангъа чыкъармакъ) мумкюн оламадыгъыны беян итти.
Хусеин мырза Улановын теклифи узерине меджлис азалары Хильмий эфендининъ бир фыркъалар хакъкъында диннинъ нокътаи назарыны изах ит-месини кендисине теклиф итмиш иселер де, о, бу меселейи шимдилик бихал (чаресиз) коререк, теклифи къабул итмеди. Ве бу хусуста бир къарар иттихаз итмеерек гидже саат бир радделеринде меджлис битти.
1917 с.
КЪУЛЛАНЫЛГЪАН ЭДЕБИЯТ
1. Алтайлы (А. Хильмий). «Зынджырлы»е хитабе (Багъчасарай медресеси-нинъ кечмиши ве келеджеги ве ишиндеки базы къусурлары акъкъында) (К «Зын-джырлы» медресе (О некоторых недочетах в работе Бахчисарайского медресе: прошлое и будущее) // Терджиман. 1913. № 73, март 30; Алтайлы. Къырымда дарульмуаллимин мунасебетиле (Относительно курсов для учителей в Крыму) // Терджиман. 1913, апрель 12; Алтайлы. Ики медресе. Эфендикой имтиханы мунасебетиле (Къырымдаки медреселернинъ исляхи (ыслахы) меселелерине даир) (Два медресе. Относительно экзаменов в Эфендикое (К проблеме реформ в Крымских медресе) // Терджиман.1913. № 93, апрель25.
2. Cafer Seydahmet KIrlmer. BazI hatlralar. (Воспоминания) Istanbul: ETAM A.§. MATBAA TESISLERI. 1993. 329 S.
3. Идареден ачыкъ мектюплер (Письма из управления) // Терджиман.1915. № 30, февраль 8.
4. Идареден ачыкъ мектюплер (Письма из управления) // Терджиман. 1915. № 82, апрель 12.
5. Акъчокъракълы О. Зынджырлы медресе мушавере меджлиси (Собрание совета по Зынджырлы медресе) // Терджиман. 1916. № 60, март 15.
6. Хаберджи. И.Лемановын Петрограддан Багъчасарая дёнмеси (Возвращение Леманова из Петрограда в Бахчисарай) // Терджиман. 1916. 80, апрель 8.
7. Алтайлы. Мухим бир изах (Важное объяснение) // Терджиман. 1916. № 92, апрель 24.
8. Хаберджи. «Коммерческий мектеп»те мусульманджа дерслер (Уроки религии в «Коммерческом мектебе») // Терджиман.1916. № 255, ноябрь 30.
Неизвестные произведения крымскотатарских писателей начала ХХ века
Исмаил Керимов
(Институт истории им. Ш. Марджани АН РТ; ГБОУВО РК «Крымский инженерно-педагогический университет им. Ф. Якубова»)
Аннотация. Более ста лет остаются недоступными для современников многие произведения классиков крымскотатарской литературы начала ХХ века. Одним из таких авторв является Абдульхаким Аджы Ариф огълу Хиль-мий (1887-1962). Статья посвящена научной разработке биографии писателя периода 1914-1917 годов. Источниками явились как газетные, так и архивные материалы, связанные с этим периодом. Привлечены также и опубликованные работы современников А.Хильмий. В качестве примера приводится неизвестная современным исследователям небольшая работа автора «Революционные возбуждения» («Инкъилябий асабиетлер»), опубликованная в 1917 году. Транслитерация текста с арабской графики сопровождена глоссариями редких арабо-персидских заимствований в крымскотатарском языке.
Ключевые слова: Крымскотатарская классика начала ХХ века, новые исследования и новые находки произведений на крымскотатарском языке, художественное наследие А.Хильмий.
Для цитирования: Керимов И. А. 100 йылдан берли эль токъунылмагъан чалышмалар // Крымское историческое обозрение. 2021. № 2. С. 73-82. DOI: 10.22378/кю.2021.2.73-82
Сведения об авторе: Исмаил Асанович Керимов - доктор филологических наук, профессор, директор Научно-исследовательского института крымскотатарской филологии, истории и культуры этносов Крыма, Крымский инженерно-педагогический университет; ведущий научный сотрудник Крымского научного центра Института истории им. Ш. Марджани АН РТ (420111, ул. Батурина, 7А, Казань, Российская Федерация); alimes@mail.ru
Unknown works of Crimean Tatar writers of the early XX century
Ismail Kerimov
(Sh. Marjani Institute of History of Tatarstan Academy of Sciences;
SBEEHE RC «F. Yakubov Crimean Engineering
and Pedagogical University»)
Abstract. For more than a hundred years many works of the classics of Crimean Tatar literature of the early XX century have remained inaccessible to their contemporaries. One of such authors is Abdulhakim Aji Arif oglu Khilmiy (1884-1962). The article is devoted to the scientific development of the writer of the period 1914-1917. The sources were both: newspaper and archival materials related to this period. Also involved are the published works of Khilmiy's contemporaries. As an example, is cited a small work by the author of "Revolutionary excitement" ("Inkilyabiy asabiyetler"), published in 1917 and unknown to modern researches. Transliteration of the text from the Arabic script is accompanied by glossaries of rare Arab-Persian borrowings in the Crimean Tatar language.
Keywords: Crimean Tatar classics of the early XX century, new research and new discoveries of works in the Crimean Tatar language, artistic heritage of A. Khilmiy
For citation: Kerimov I. A. Unknown works of Crimean Tatar writers of the early XX century. Krymskoe istoricheskoe obozrenie=Crimean Historical Review. 2021, no. 2, pp. 73-82. DOI: 10.22378/kio.2021.2.73-82
REFERENCES
1. Altayly (A. Khil'miy). «Zyndzhyrly»e khitabe (Bag"chasaray medresesinin" kechmishi ve keledzhegi ve ishindeki bazy k"usurlary ak"k"ynda) [An appeal to "Zyndjirli" (about the past and future of the Bakhchisarai madrasah and some shortcomings in the work)]. Terjiman [Translator]. 1913. No. 73, March 30; Altayly. K"yrymda darul'muallimin munasebetile [In connection with darulmuallimin (male teacher's institute) in the Cromea]. Terjiman [Translator]. 1913, April 12; Altayly. Iki medrese. Efendikoy imtikhany munasebetile (K"yrymdaki medreselernin" islyakhi (yslakhy) meselelerine dair) [Two madrasahs. In connection with exam in Efendikoy. With regard to improving problems of Madrasahs in the Crimea]. Terjiman [Translator]. 1913. No. 93, April 25. (In Turkic).
2. Cafer Seydahmet KIrImer. BazI hatlralar [Some memories]. Istanbul: ETAM A. sh. PRINTING FACILITIES. 1993. 329 Pp. (In Turkish).
3. Idareden achyk" mektyupler [Open letter from the governing body]. Terjiman [Translator].1915. No. 30, February 8. (In Turkic).
4. Idareden achyk" mektyupler [Open letter from the governing body]. Terjiman [Translator]. 1915. No. 82, April 12. (In Turkic).
5. Ak"chok"rak"ly O. Zyndzhyrly medrese mushavere medzhlisi [ Advisory council of Zyndjirli Madrasah]. Terjiman [Translator]. 1916. No. 60, March 15. (In Turkic).
6. Khaberdzhi. I.Lemanovyn Petrograddan Bag"chasaraya denmesi [Lemanovs return from Petrograd to Bakhchisarai]. Terjiman [Translator]. 1916. 80, April 8. (In Turkic).
7. Altayly. Mukhim bir izakh [One important clarification (comment)]. Terjiman [Translator]. 1916. No. 92, April 24. (In Turkic).
8. Khaberdzhi. «Kommercheskiy mektep»te musul'mandzha dersler [Muslim lessons at the "Commercial school"]. Terjiman [Translator]. 1916. No. 255, November 30. (In Turkic).
About the author: Kerimov Ismail Asanovich - Dr. Sci. (Philology), Director of the Scientific Research Institute of the Crimean philology, history and culture of the Crimean ethnos, SBEEHE RC "F. Yakubov Crimean Engineering and Pedagogical University" (295015, Simferopol, Uchebnyy lane, 8, Russian Federation); Leaading Researcher of the Crimean Scientific Center of Sh. Marjani Institute of History of Tatarstan Academy of Sciences (420111, Kazan, Baturin str.,7A, Russian Federation;_alimes@mail.ru
