The reasons for the start of Publication and the cessation of the Publication of the Al-Nahda newspaper Текст научной статьи по специальности «СМИ (медиа) и массовые коммуникации»

ГАЗЕТАДЖЫЛЫКЪ - ЖУРНАЛИСТИКА

Велиев Аблязиз1 E-mail: [email protected]

«Аль-Нахда» газетасынынъ чыкъув ве чыкъмаюв себеплери

УДК: 070

Анълатма.

Макъаледе «Терджиман» газетасынынъ муаррири, белли джемаат эрбабы И. Гаспринскийнинъ умумий Ислям конгресси кечирюв гъаесинен 1907 сенеси Къахирада 600 адам огюнде буюк бир марузанен чыкъкъаны, сонъра кечириледжек конгресске азырлыкъ корювде ярдымджы оладжакъ «Терджиман» газетасына иляве оларакъ арап тилинде «Аль-Нахда» («Тикленюв») газетасы чыкъарылып башлангъаны, амма о, чокъкъа бармай озь фаалиетини токътаткъаны ве бунынъ себеплери икяе олуна.

Анахтар сёзлер:

И. Гаспринский, онынъ Къахирадаки хутбеси, Ислям конгресси кечирюв гъаеси, «Аль-Нахда» газетасынынъ фаалиети.

Къырымтатар миллий матбуатынынъ эсасчысы Исмаил бей Гаспринский 1883 сенеси апрель 10-да «Терджиман» газетасыны чыкъарып башлагъан сонъ, онъа иляве оларакъ «Алем-и-нисван», «Алем-и-субьян», «Ха-ха-ха» киби бир сыра илявелер нешир эттирди. Олардан кене бири Къахирада арап тилинде чыкъкъан «Аль Нахда» («Тикленюв») газетасыдыр [2].

Биз ашагъыда иште шу сонъки илявенинъ чыкъувы ве токътатылувынен багълы меселелерге токъталмакъ истеймиз.

Исмаил бейни факъат къырымтатар халкъынынъ дегиль де, бутюн ислям дюньясынынъ такъдири де пек раатсызлай эди. Нетиджеде о, бу саада насылдыр денъишмелер япмакъ кереклиги акъкъында тюшюнди. Шу мунасебетнен «Терджиман»да умумий ислям конгрессини тешкилятландырмакъ лязимлиги акъкъында хабер бере [1]. Оны Маджаристаннынъ пайтахты Будапештте яшагъан, «Терджиман»нынъ даимий абунеджиси, белли шаркъшынас, маджар еудийси Арминиус Вамбери инглиз тилине чевирип, Лондонгъа «Таймс» газетасына ёллай. Макъале анда басылгъан сонъ, гъарп мемлекетлеринде буюк шав-шув догъура, батынынъ дикъкъатыны озюне джельп эте.

Ниает, 1907 сенеси октябрь айынынъ сонъларында франсызджаны мукеммель бильген, лякин арапча бильмеген Исмаил Гаспринский геминен Мысыргъа келе ве арапча бильген бир къазантатар генчини озюне терджиман этип ала. Рамазан айынынъ 25-нде акъшам Мысри-ль Къахирадаки «Континенталь» отелинде 600 къадар мутебер инсанлар узурында И. Гаспринский хутбе иле чыкъышта булуна. Бу чыкъышнен умумий ислям конгрессини кечирювге давет этти.

Конгерсстен макъсад не эди? Асырлар бою, олсун илимде, олсун эснафчылыкъта, олсун медений омюрде ог сафта олгъан ислям дюньясы кет-кете озь итибарыны джоя. Бир вакъытлар ондан акъыл ве унер огренген мусульманлар Джезаирде еудийлерден, Критте румлардан, Булгъаристанда булгъарлардан, Русиеде эр кестен кериде къалалар. Икътисадиятта, тиджаретте эп ашагъы кетелер. Эгер шай девам эте берсе, бу ислям дюньясыны фелякетке огъратаджакъ. Буны мытлакъ тюзетмек чарелерини корьмек лязим. Насыл этип? Насыл ёлларнен? И. Гаспринский шу хусуста баас эте. Бу меселелерни музакере этмек ве чезюв ёлларыны бельгилемек ичюн умумий ислям конгрессини кечирмек кереклигини айта [1].

Мен бу ерде Исмаил Гаспринскийнинъ шу корюшювде япкъан марузасыны олгъаны киби толусынен кетирмек истейим.[5, с. 229-233].

1 Велиев Аблязиз, заведующий лабораторией учебной литературы на крымскотатарском языке и языках малочисленных этносов Крыма НИИ крымскотатарской филологии, истории и культуры этносов Крыма ГБОУВО РК КИПУ имени Февзи Якубова (Симферополь, Крым)

«Сайын динълейиджилер!

Ислямиет алемининъ бугуньки алына дикъкъатле бакъылырса, эр тарафта, азмы, чокъмы фикирлер уяндыгъы горюлир. Эр этрафта фикирлери арекете гечирен газетелеринъ чыкътыкълары ве базы музакере топлантыларынынъ япылмыш олдугъы эшитилиёр. Бунлар гузель аляметлердир. Лякин бу гузель аляметлере алданып гъафлет этмек джаиз (мумкюн - бу ерде ве бундан сонъ бутюн анълатмалар бизимдир - А. В.) дегильдир, бельки хатадыр. Чюнки гъает гериде, аркъада къалдыгъымыздан геледжеги темин ичюн пек чокъ гъайретлер, пек джиддий чалышмалар герекеджектир.

Сайын динълейиджилер!

Кузейдеки (шимальдеки) Къазандан, гунейдеки (дженюптеки) Мысыра ве батыдаки Фастан (Меракеш) догъудакиДжавая (Ява адасы) къадар араштырыджы гозьле бакъылырса, ислям огъулларында уйгъарлашма (меденийлешмек) эсерлеринден ве юксельмеден зияде герилеме эсерлери горуледжектир. Медреселер ве мектеплер харап ве файдасыз бир алдадыр. Къазанч ве мааллий санайы я мункъарыз (сёнген, биткен) олмуш я олмакъ ёлундадыр. Эснафлар сонмектедир, дюньянынъ тиджаретинде иссемиз пек аз къалмыштыр. Умур-и саррафиеде (кредит ишлеринде) башлангъычымыз олмадыгъы гиби, денъиз тиджаретинден иссемиз ич бир пай олмамыш булунуруюз. Учь юз миллионлыкъ бир миллетинъ отуз вапурлы (гемили) бир денъизджилик ширкети, беш миллион сермиялы бир банкасы мевджут дегильдир.

Сайын динълейиджилер!

Дикъкъат этинъ, эпимизинъ гечим себеплери анджакъ баба, эдждаттан къалма топракъларынъ вердиги табиий берекет саесиндедир. Унер ве марифетле асыл эттигимиз шей пек аздыр. Берекетли топракъларымыз бир чокъ шейлер асыл эдиюр. Бунлары дюнья базарларына чыкъарып сатмакъ дахи элимизден гельмиюр. Бундан бойле берекетинъ бир иссесини, малымызы накъледен (ташыгъан) эджнебий гемиджилерине вермеге меджбурыз.

Тиджарет мейданы олан Авропа, Америка къыталары изленир (козетир),аранырса (тапылса) ич бир бельдесинде (шеэр, мемлекет) мусульман таджири (тиджаретчиси) булунмаз. Булундыгъы такъдирде истисна къабилинден (истисна оларакъ) олур. Шаркълы таджире раст гелинирсе, я эрменидир, я румдыр, я яхудийдир, я инд, лякин муслуман дегильдир.

Ишбу Мысырда 20 къадар инд магъазалары(тюкян,анбар) вар. Гузель тиджарет эдиёрлар. Ама, ич бири муслуман тиджаретханеси дегильдир. Бизим Къазанда, Бакуде эр миллеттен таджир ве мисафир булунур, ама инд я ки мысырлы бир муслуман таджир горуньмез.

Дыш мемлекетлерде иш горемедигимизден сарф-и назар, кенди ватанымызда дахи аджиз къалиёруз. Туран ве Иранынъ, Османлы ве Мысырынъ, Кузей Африканынъ ве Индинъ ерли тиджарети, алыш-вериши йине эджнебилеринъ элиндедир.

Сайын динълейиджилер!

«Ягъмур ягъар ичериз, ерден чыкъар ериз» иле бугунь дюньяда омретмек (яшамакъ) мумкюн исе, ярын бойле айванджа гечинмек ве рызкъ къазанмакъ мумкюн оламаяджакътыр.

Бу мискинлик, бу фаалиетсизлик, бу унерсизлик бизлери битиреджектир.

Эджнебисиз ве ялынъыз муслуман чалышанларийла ислям укюметлеринде иш горемиёрлар. Демирёлу, денъиз рыхтымы (искеле, ялы), канал, фабрика теэсис олунаджакъ исе, эджнеби усталарына, эджнеби муэндислерине мухтадж къалыёрлар.Сёзюнъ къысасы, Атлантик саилинде шехри Рибат, догъуда Шахабад, эп бир дередже бербат. Ишгузар лязим олса ярамиёр Али, Мурад ве Худадат, герек олуюр мытлакъ я Жорж, я Фердинанд.

Сайын динълейиджилер!

Бир къавым, я миллет, сиясий икътидарыны ве истикълялыны гъайбетсе, эбет, буюк йыкъымдыр, буюк зияндыр. Лякин къазанч джабаларынынъ нокъсанлыгъы иле, икътисад ве тиджарет мейданында ерини гъайбэдерсе бир дегиль он дефа зияндыр ве инкъыразынъ башлангъычыдыр.

Бутюн ислям халкъынынъ теэссюфли бу алына себеп недир? Эгитимсизлик (тербиесизлик), джеалет денилирсе, бунларынъ себеби недир сорусу гелиёр... Ябанджы миллетлер ве къавимлерден вазгечелим, бундан элли, алтмыш сене эввель, муслуманларла бирликте яшаян, муслуман адетлерине таби булунан эрменилер, гурджилер бир дередже булундыкълары алда бугунь медени олмада ве юксельмеде бизлерден илерие не иле ве насыл чыкътылар?

Сайын динълейиджилер! Бу аллери душунмелийиз. Алымыз чокъ аджджы ве эсеф вериджи (теэссюфлендириджи) бир алдыр. Лякин бунъа къаршы гозь юммакъ, бу алы гизлемек джаиз дегильдир, хатадыр, къазадыр, гунахтыр. Бу алымызы, бу дердимизи гизлемек дегиль, джадделерде,

мейданларда багъырып, чагъырып сёйлемелидир. Ёкълугъыны гизлейен вар олмаз, дердини сёйлемеен шифа буламаз. Дердимизе, чаремизе бакъмалыйыз. Акси алда ичтен чюрюе-чюрюе бир гунь дюшер, яйылыр къалырыз. Сайын динълейиджилер: Меселенинъ алыны, хасталыгъынъ девасыны бенден истемейиниз. Аджизлеринде бу къадар бильги ве къуввет ёкътыр. Анджакъ чокъ сенелердир бу меселе иле огърашыёрум. Лякин чаресини буламуюрым. Асыл арап къавмынынъ медений къабилиети ве икътисадий фаалиети, тарихи иле мюсреттир (исбатлангъандыр). Къараман тюрклеринъ етиштирдиклери улеманынъ ве эдиплеринъ эсерлери, Семеркъанд (Самаркъанд) расатханесининъ (обсерватория) харабелери,бутюн Асия къанун ве низам вердиклери, бунларынъ дахи табиий истидатларына делилдир.

Туран къавмларындан олан финляндиялыларнынъ ве маджар «венгерлер»нинъ икътисады ве медений фаалиетлери джумле тюрклеринъ медений истидатларына дигер бир делилдир. Фарсларынъ, иранларынъ тарих ве эдебиятлары кеза (бойле) истидатларына кефильдир. Демек истиёрум ки, арап, тюрк, фарс ве инд ислям къавмларынынъ бугуньки тюшкюнлиги, ярадылыш ве табиатларындан илери гелен бир ал дегильдир.

Бойле исе, фаалиет ве меденийлешме ёлларымызы кестирен, ачыкъ мейданда олан ислям диними? Хайыр, хайыр, шерефленмиш булундугъумуз ислям дини, илерилеменинъ, меденийлешменинъ къайнагъыдыр. Эвельдже горюльмуш теракъкъимизинъ бельки баш себеби ве арекете гетиренидир. Эвельдже горульмуш теракъкъимизинъ бельки баш себеби ве арекете гетиренидир. Динимиз, бир мукъаддес къанундыр ки, «Джумленъиз чалышынъыз, джумленъиз окъуйынъыз, джумленъиз тедбир ве санат иле яшайынъыз» къаиделерини эмредер. Бизлер исе бугунь бу къутсал (мукъаддес) эмирлеринъ тамамен аксини ишлиёруз. Ишсизлик, санатсызлыкъ, джаиллик эп бизде. Себеп, халкъымызынъ бурасындадыр. Икътисадий дюшкюнлигимизе, фикир ве акъыл арекетсизлиги, яни шаркъ алеминде бир фикир, бир эсер ве бир эдип чыкъмасына къаршы, баты дюньясында юз фикир, юз эсер, юз эдип баш гостердиги иляве олунурса, алымызынъ не къадар зор олдугъы даа эйи анълашылабилир.

Ислям алемининъ джошкъунлыгъына бир дередже Америка къытасынынъ кешфи себеп олмуштыр заннедерим. Догъу ве батынынъ эски ёл иле тиджаретине ислям мемлекетлери умуми кервансарай иди. Буюк истифаделер (файда коре) эдиёр иди. Америка кешфи денъиз тиджаретине, денъиз ёлуйла мейдан ачып, ислям мемлекетлерине кесильме ве дургъунлыкъ гетирди. Бунунъла берабер Аврупада макинаджылыкъ (машинаяпыджылыкъ) илерилеерек бизим эски усул тезгяхларынъ маллары дередже-дередже пазарлардан чекилип, фабрика ималаты (махсулаты) мейдан алды, гъалебе чалды (гъалебе къазанды). Бу аллар инкяр олунамаз. Бизлери йыкъан, душурен ялынъыз бу олмаса геректир. Бельки даа зиядеси фена адетлеримизден,эвхам (къурунту, меракъ), ве тюрлю хурафелерден (хурафатлардан) илери гельмиштир (келип чыкъкъандыр). Бу беним бир занымдыр. Акъикъий алны кешфе (ачыкъламакъ, тюшюнип чыкъармакъ) икътидарым олмадыгъыны юкъарда сёйлемиштим.

Бойле бир меселенинъ hаллu (талиль этильмеси, чезильмеси), герилемемизинъ себеплерининъ кешфи ве девасынынъ дузенленмеси (эйилештирильмеси) бир ве я эки адамынъ къудретининъ дышындадыр. Бинаеналейх (бундан себеп), къыса акълыма горе асрымызынъ илим адамларындан, эрдемли (мунасип, ляйакъатлы)кимселерден, иш билен ве эдиплерден къурулу бир топлулыгъынъ бунъа чалышмасына мухтадждыр занедерим. Яни бойле бир меселе ве бойле дертлере чарелер булунабилирсе му-темер-и умум-и ислямийе, яни мусульман конгресси гучу иле вуджут булабилир. Хемен ( аджеле суретте) шурасыны аджеле иле арз эделим ки, муслуман конгресси, му-темер-и ислями дедигимден панисламизм яки сиясий бир топланты акъла гельмесин. Къонушманынъ башындан бери сёйлейип гельдигим герилик ве душкунлиге сонъ вермек, сосиаль ве экономик теракъкъимизе ёл ачмакъ иле асрымызнынъ илерилемесинден иссе саиби олмакъ арзусындан башкъа бир шей олмадыгъы анълашылмакъ геректир.

Бинаеналейх, сиясий мевзулардан бахс эдильмемек шартлары алтында мутемер-и ислямиййейе давет ве топланты япылмасыны зарури горуюр (ум).

Сайын динълейиджилер, ишбу му-темер-и умуми-и ислямиййенинъ, меселя бундан бир сене сонъра Дерсаадетте (Истанбул) яки пай-и тахт-и (пайтахты) таби олан (эмир алтындаки башкент олан) Миср-уль Къахиреде топланмасына азырлыкъ геректир. Ильми ве медени мевзулардан бахсэтеджек бу му'темеринъ (конгресснинъ) вуджудынаэнгель(маниа) оладжакъ себеп яки бураларданДженеврейе (Женева) интикъалине (бир ерден башкъа бир ерге авушмакъ) меджбуриет горемиёрум. Эгер бойле исе, эгер арз эттигим фикир мунасип исе шимдиден бу ише башламакъ лязимдир.

Занн-ы аджизанеме горе (шубенен бакътыгъыма коре ) эввеля Къахиреде мухтерем улемадан, эрдемли кишилерден ве эдиплерден «Тедарикъат комиссиясы» (азырлыкъ комиссиясы) сечими япылмалы. Бу комиссион

къысаджа конгренинъ программыны ве эр тарафтан салахиетли (итибарлы) кимселеринъ даветини, дигер комиссионларла хаберлешмейе башлайып, лязим гелен ерлере ресмен башвуруларда (риджада) булунур ве бойледже ислям конгрессининъ даветине башланылыр. Комиссионынъ язышмаларына, хаберлешмесине, илянларына бир микъдар масраф лязим оладжакътыр. Факъат эминим ки\. пара меселеси ише энгель (маниа) олмаз. Бен де ве эр кез иссесини вереджектир. Беним бильдигим бу къадар, герисини (къалгъаныны) ислям алеми билир.

Узун узадие башынъызы туттугъум ичюн аффынызы темени эдиёрум» [5, с. 229-233]2.

Шундан сонъ меджлис эхли беш-он дакъкъа эльчырпып Исмаил Гаспринскийни алгъышлай. Исмаил бейден сонъра минберге Шейх Али Юсуф чыкъа ве пек яхшы, анълайышлы, ич бир хусуры олмагъан хутбе ичюн тешеккюр бильдирип, Исмаил бейнинъ теклифи эр кес тарафындан бегениледжегини ве къабул этиледжегини айта эм де ислям конгрессининъ даветине хызмет ичюн мухтерем инсанлардан тертип этиледжек азырлыкъ комиссиясынынъ лейхасыны такъдим эте.

Гаспринскийнинъ бу корюшювдеки чыкъышы «Терджиман»да басыла. Гаспринскийнинъ ильк Къахира зияретинден сонъ, арадан эки кунь кечкенинен конгресс теклифини даа илери ташымакъ узьре бир тешкилий комитет тизиле. Къахиранынъ илери адамларындан, Аль-Азхар ислям университетининъ ректоры Селим аль-Бешрининъ эвинде топлангъан бу комитет кенди арасындан конгрессни тертип этмекле огърашаджакъ бир мутешеббюс эйет сече. Эйет кениш бир сиясий фикир ве диний горюш ёлуны темсиль эткен, эсас оларакъ бири-бирини анълагъан группаларгъа менсюп кишилерден мейдангъа кельген эди. 1908 сенеси январь 21-де эйет тарафындан конгресс низамнамеси ишлеп чыкъыла. О, арапча, тюркче, инглиздже, франсызджа ве фарсча азырланыла ве османлы матбуатындан гъайры, мусульман ве христиан неширлеринде де илян этиле.

Конгресс материалларыны ве гъаелерини тешвикъ эткен бир газета лязим эди. Иште буны козь огюне аларакъ, Исмаил бей Къахирада «Терджиман» газетасына иляве оларакъ арап тилинде «Аль Нахда» («Тикленюв») ады иле газета чыкъарып башлай. Онынъ биринджи саны 1908 сенеси февраль 15-те джума куню 2000 нусхада чыкъа. Бу газетанынъ ёнелиши (ёлу) янъылыкъ, исляат ве илерилемек фикирлерини ачмакътан ибарет эди. Бу сан мысыр халкъына хитабен «Фелляхлара хитап» макъалеси иле ачылды [2].

Газета окъуйыджылар тарафындан гъает гузель къабул олунды. Эписи олып арап тилинде онынъ16 саныны чыкъармакъ, сонъра Истанбулда 16 саныны тюрк тилинде, даа сонъ Техранда 16 саныны фарс тилинде ве ниает Делиде 16 саныны урду тилинде чыкъармакъ ниетинде эди.

Лякин конгресс этрафында гъает къызгъын мунакъашалар, къаршы турувлар башланды. Мысырда чыкъкъан чешит ёнелиш ве бакъыштаки «Аль-Урвату-ль Вуска» («Къопмаз багъ»), «Аль-Менар», «Аль-Лива»), «Аль-Ахрам», «Аль-Мукъаддам» газеталарынынъ чокъусы конгрессни чаналатмакъ ичюн эллеринден кельген эр шейни яптылар. Конгрессни отькерюв ери ве вакъты, гъаелери акъкъында да чокъ ерли, ерсиз мунакъашалар олып кечти. Бунынъ кечирильмесине аякъ чалгъан Русиели мусульманлар ве неширлер де аз олмадылар (меселя, «Русие», «Шаркъ рус» газеталары, «Аль-Мукъаттим» нешири, «Ульфат» газетасы, ташкентли молла Абдурешит Ибрахимов киби джайиль моллалар).

Бутюн булар конгресске азырлыкъ ишлерине буюк бир федаийлик иле янашкъан Шейх Мухаммед, Тевфикъ аль-Бекрийнинъ джиддий бир рухий раатсызлыкъкъа дучар олмасы иле екюнленди. Аль-Бекрий бутюн вазифелеринден чекилерек, Бейруттаки бир рухий хасталар хастаханесине ерлештирильди. Бу, 1911 сенеси олды. Бойлеликнен, Гаспринскийнинъ о замангъа ниет эттиги темеллер дагъылды.

Бу ишке Истанбул да умумен къаршы эди. Айткъанларына коре, конгрессни Тюркиеде кечирмек истеги барлыгъыны эшиткен тюрк султаны II Абдульхамид учь гедже юкъламагъан.

«Аль Нахда»нынъ эписи олып учь саны (экинджи саны март 3-те ве сонъки саны март 6-да) чыкъкъан сонъ, газета озь фаалиетини токътатты [3]. Албу ки, о девирде бу гъаени къапкъач тутып алгъан немселер 2-3 ай ичинде Австрия пайтахты Венада 37 алман ширкети ве миллий группалар векиллерининъ топлашувыны, инглизлер де, Русие, Булгъаристан, Югославия ве дигер славян мемлекетлери бирлешип, озь дюнья конгресслерини отькердилер.

Бу конгрессни кечирюв гъаеси тек Гаспринскийден чыкъты, десек янълыш олур. 1893 сенеси мусульман сиясетчиси ве фаали Джемаледдин Афгъани, онынъ мысырлы ёлдашы Мухаммед Абдух ве Решид Риза эм де арадан беш йыл кечкен сонъ Мухаммед Абдух ве Решид Риза эм де дигерлери бойле конгресслерни кечирюв тешеббюсинен чыкъышта булунгъан эдилер. Лякин бу саада Гаспринскийнинъ бакъышлары оларнынъкинден

2 Транслитерация япкъан А. Велиев

бам-башкъа эди. 1926 сенеси майыс 13-19 куньлери Къахирада Хилафет дюнья мусульманлары конгресси ве 1926 сенеси июнь 7 - июль 5-те Меккеде мусульман дюньясынынъ конгресслери кечирильди. Лякин олар Гаспринскийнинъ теклиф эткенинден тамамиле фаркълы эди. Булардан биринджиси о сырада озь бакъышларыны башкъаларгъа тыкъыштырмагъа арекет этип япылгъан олса, экинджиси Саудия ханеданы тарафындан янъы эльге кечирильген Мукъаддес шеэрлердеки ишлернинъ нормаллештирильмеси иле багълы эди. Лякин Исмаил Гаспринскийнинъ тюшюнген шекильде дюнья мусульманларынынъ конгресси аля даа отькерильгени ёкъ.

«Аль Нахда»нынъ омюри къыскъа олса да, о, мусульман дюньясынынъ козюни ачып етиштирди. Умумджиан Мусульман Конгрессининъ ичтимаий-сиясий нешири оладжакъ бу газетада ислям алемининъ актуаль проблемлери, мусульман халкъларынынъ кечмиштеки ве бугуньки вазиети эм де бойле кетсе онынъ келеджеги насыл олабиледжеги, бунынъ ичюн тюрк-арап дюньясынынъ халкълары нелер япмакъ кереклигини айтып етиштирди.

Газета сиясий меселелерни котермемекни (чюнки ойле япса бутюн гъарп мемлекетлери аякъкъа тураджагъыны Гаспринский биле эди), эсасен икътисадий, медений ве тасиль эм де диний меселелерни реформа япмакъ киби энъ зарур сааларны котермек ве омюрге кечирмеге ярдымджы олмакъны къарарлаштыра эди.

Газетанынъ редакциясы Къахирадаки «Минерва» мусафирханесинде ерлешкен олып, афтада эки кере чыкъмакъны къарарлаштыра эди. Теэссюф ки, ниетлер бошкъа чыкъты. Бунъа бакъмадан газета озь ишини япты ве тарихта белли йыз къалдырды.

Велиев Аблязиз.

Причины начала издания и прекращения выпуска газеты «Аль-Нахда»

Аннотация: В статье речь идет о выступлении И. Гаспринского в 1907 году в Каире с идеей о проведении Всемирного исламского конгресса, а также о короткой судьбе издания на арабском языке «Аль-Нахда» («Прометей»), приложения к газете «Терджиман» («Переводчик»), которое освещало подготовительную работу исламского конгресса.

Ключевые слова: Исмаил Гаспринский, выступление в Каире, Всемирный исламский конгресс, газета «Терджиман», газета «Аль-Нахда» («Прометей»).

Veliev Abliaziz.

The Reasons for the Start of Publication and the Cessation of the Publication

of the Al-Nahda Newspaper

Summary. The article is about the speech of I. Gasprinsky in 1907 in Cairo with the idea of holding the World Islamic Congress and the short fate of the Arabic edition of Al-Nahda (Prometheus), an appendix to the Terjiman newspaper (Translator), which covered the preparatory work of the Islamic Congress.

Keywords: Ismail Gasprinsky, speech in Cairo, World Islamic Congress, newspaper Terjiman, newspaper Al-Nahda (Prometheus).

Эдебият

1. Терджиман. - 1907. - № 75. - Ноябрь 20.

2. El-Nahdat (En-nahda = Rönesans) // Terciman. - 1908. - № 14. - Fevral 22.

3. El-Nahdat cazetesinden // Terciman. - 1908. - № 16. - Fevral 29.

4. Misir'dan mektup // Terciman. - 1908. - № 21. - §ubat 28.

5. ismail Bey Caspirali'nin idealleri, isleri, ve haberleri / haz. S. Arikan. - istanbul: Türk Dünyasi Arastirmalari Vakfi, 2006. - S. 229-233.