CC BY
44Литература и язык
УДК 82-94 001: 10.22378/к1о.2019.2.155-164
Бекир Чобан-заденинъ биографиясында базы худжур ракъамлар
Исмаил Керим
(Февзи Якубов адына Къырым муэндислик ве педагогика университети; Татарстан Джумхуриети Илимлер Академиям, Ш. Марджани адына тарих Институтынынъ Къырым ильмий меркези)
Анълатма. Белли языджы ве тюркшынас-алим Б.Чобан-заденинъ (1893-1937) терджиме-и-халы ильмий джихэттен монографик шеклинде огренильмесине бакъмадан, «Ветан хадими» (1906-1908), «Ешиль ада» (1920), «Бильги» (1921) газет ве дергилери киби арабча язылы бир сыра менбаларнынъ сийрек булунмасы себеби иле догъру чезильмейип хаталар-гъа ёл къоюлгъандыр. Меселя, онынъ башлангъыч мектепке бармасы, Къа-расувбазардаки рушдиеде окъумасы деври, Тюркиедеки «Султание» лицей-ине кирмеси сенеси ве башкъа фактлар янълыш берильмекте. Макъаледе керекли мисаллер ве менбалар ишлетилип бу сой янълышлар догърултыл-масына арекет этильмекте. Эм де булар Б.Чобан-заденинъ кендиси язгъан мектюплери иле ачыкъланып онынъ аятий ве ильмий ёлуны объектив акс этмектелер.
Анахтар сёзлер. Къырымтатар алимлери, Б.Чобан-заденинъ биографи-ясы, къырымтатарджа нешир этильген сийрек менбалар.
Алынты ичюн: Керим И. А. Бекир Чобан-заденинъ биографиясында базы худжур ракъамлар // Крымское историческое обозрение. 2019. № 2. С. 155-164. БОТ: 10.22378/кю.2019.2.155-164
Белли къырымтатар эдиби ве алими Бекир Чобан-заденинъ терджиме-и-алыны огрениркен, бугуньде де бир сыра ич уйгъунлашамагъан ракъам-ларны растлаймыз. Табий ки, бу ал онынъ аяты ве фаалиетини огренгенде, ардыч сюрюнгилери киби, ер ичинден тюртип турып талебе ве оджаларны, онынъ иджадынен меракълангъан эр кимни, иште, о ракъам ве базы факт-лар «сюрюнгилерине сюрюндире» ве шашмалаталар.
Меселя, 1920 сенеси 23 июньде Чобан-заде Женевада алгъан паспор-тында онынъ догъгъан сенеси 1892 деп косьтерильмекте. Паспортта догъ-гъан ери ве сенеси араб язысыле догърудан-догъру бойле къайд этильмек-те: «Махаль ве тарих: виляет-и-Къырым 1892» [10, с. 15]. Биз исе бугунь онынъ догъгъан йылы ве кунюни 1893 майыс 15 деп билемиз. Чюнки сонъ-кисини Чобан-заде 1920-нджи сенелери чешит анкеталар толдургъанда, бойле къайд эткен эди. Ама Женевада Тюркие баш эльчисинден паспорт алгъанда, анкеталарны озь къолунен толдурмадымы?
Бугуньде биз оны Къарасувбазар шеэринде догъды деп билемиз. Чюнки 1934 сенеси илим хадимлери анкетасыны ве шу девирде башкъа анкета-ларны толдурыркен, догъгъан ерини Къарасувбазар шеэри деп косьтере [4, с. 245]. Ама университетке киргенде, толдургъан анкетасында догъгъан ерини Аргъын кою деп къайд эте [10, с. 13]. Къарасувбазар виляетининъ бир коюнде догъгъаны акъкъында А.Булдеев де язмакъта [2].
Бир сыра весикъаларда Къарасувбазар рушдиесини 1908 сенеси битир-гени косьтерильмекте. Меселя, 1931 сенеси кечирильген ильмий хадим-лернинъ бутюнсоюз сайымында Б.Чобан-заде Къарасувбазар рушдиесинде дёрт йыл окъугъаны ве оны 1908 сенеси битиргенини къайд этмекте. Ама «Терджиман» газетасынынъ саифелеринде рушдиеде 1909 сенеси майыс 28-де сонъки имтиханларыны бергени ве шахадетнаме алгъаны хусусында аркъадашларынен берабер хабер этмекте. Рушдиени битирген учь аркъа-даш Гаспринскийнинъ адына ашагъыдаки мектюпни кондерелер:
Идарее мектюп.
Мухтерем педеримиз! Йигирми беш сенелик тергъибат (истеклендир-мелер) ве тешвикъатынъызын бахш иттиги семереден олмакъ узьре хамд олсун бугунь Къарасув мектеб-и-рушдиесинден балякемал (буюк еткинлик акъкъында) шахадетнаме ихзарына (азырлыкъ шаадетнамесине) муваф-факъ олдукъ. Мектебимизин тевазю мукяфаты (имтиханлары) майыс 28-де пенджшенбе (джума акъшамы) куню саат бирде башлаяракъ, бир джем гъа-фир (инсан къалабалыгъы, чокълугъы) хузурында такъдим хузур алийлери къылынан тертип узьре иджра идильмиш олмакъле зат мухтар (кенди ба-шымызле) маниаларны [аркъада къалдырып] маариф-и-ислямие хусусында [бильгилеримизге къыймет кесильгенде] бир педер-и-мюшфикъ (баба шеф-къаты киби) билерек вакъи халы арз идериз. Мумкюн исе дигерлерине де нумюне-и-имсаль оларакъ мунасип бир суретте газете-и-мутеберинъизде
дердж буюрылмасыны зирдеки (ашагъыдаки) вази-имза иден (имза къойгъ-ан) эвлятларынъыз сиз педеримизден истирхам (мерхамет) эйлериз.
Къарасувбазар мектеб-и-мюнтефи сыныф (мезун олгъан) шакирдле-ринден эвлятларынъыз: Абдульрахим Наби, Абдулькерим Сабит, Бекир Сыдкъи [1].
1935 сенеси Азербайджан университетинде чалышыркен, кенди автоби-ографиясыны язгъанда, Будапешт университетине кирген йылыны 1914 деп косьтере. Акъикъатта исе 12 октябрь 1916 сенесидир. Чюнки ишбу уни-верситетке киргенде берильген махусус весикъа бардыр. Онынъ копиялары сонъ йылларда нешир этильген Чобан-заде иле багълы китапларда басыл-дылар.
Табий ки, бу ве бойле аллар ола тургъан ве шимди де аз-чокъ расткель-мекте. Атта дикъкъатнен толдурылгъан анкеталарда насылдыр «иллелер» тюртип чыкъмакъта. Бунынъ эсас себеби, занымызджа, ашыкъчанлыкътыр. Анкета толдурмакъ аслында, бир тарафтан, джан сыкъысы олгъанындан, ве дигер тарафтан, динамик бир аят кечирген инсанларда, эр вакъыт табий бир ашыкъчанлыкъ козетильмекте.
Даа бир нокъта - Чобан-заденинъ биографиясындаки «къалабалыкъ» онынъ аяты ве фаалиетининъ араштырыджыларында материал ве малюмат етишмегенинден келип чыкъмакъта. Меселя, Бекир Чобан-заде 1930-нджы сенелерининъ орталарында озь къолунен язгъан автобиографиясында 1924 сенеси Къырым университетининъ ректоры вазифесине сайлангъаныны къайд этмекте. [ 4, с. 232] Табий ки, бойле бир шей олмасайды, Чобан-заде буны язмаз эди. Ама проф. В.П.Филоненконынъ арабшынас акад. И.Ю. Крачковскийге язгъан мектюбинден корюне ки, 1924 сенеси олып кечкен университет ректорынынъ сечимлеринде, акъикъатен, Б.Чобан-заде сай-лангъан, ве атта сечимлер вакътында Б.Чобан-заде кендисининъ кандида-турасыны сечимлерге къоймагъа ве оны сайлагъанларыны истемеген. Ама сонъра разы олгъан. Сечимлерде оны сайлагъанлар ве сайлавлардан сонъ, профессура огюндеки тешеккюрат сёзюнде Къырым университетини ве онынъ медицина факультетини сакъламагъа арекет этеджегини айткъан [4, с.107]. Лякин онынъ кандидатурасыны Москвадаки «Главпрофобр» тасдыкъламагъан... Бугуньде шу сечимлернинъ протоколлары къайда? В.П.Филоненконынъ мектюби олмасайды, бу меселе бус-бутюн къаран-лыкълар ичинде къаладжакъ эди.
Дигер тарафтан Б.Чобан-заденинъ биографиясындаки бир сыра янълыш ракъамлар ве фактларгъа араштырыджылар тарафындан да къошулгъан янълышлар бардыр. Меселя, проф. Д.П.Урсунынъ Б.Чобан-заде акъкъын-даки монографиясында (с. 262) муэллиф Шевкъи Бектуренинъ макъалесин-деки «янълышларны» догъурткъан киби олып, кендиси къаба хаталаргъа ёл къоймакъта. «Иптидаий» мектепнен «Идадие» мектеплерини къарыш-
тыргъаны себебинден, Чобан-заде Истанбулдаки окъувындан 1914 сенеси язында Кьырымгьа къайтып, татильден сонъра кене Истанбулгъа кетип окъувыны девам эткенини яза.
Бу меселени терендже ве дикъкъатлыджа огренип, объектив малюматны мейдангьа чыкъармакъ ичюн якьында кечирген тедкъикъатымызда кьолу-мызгьа кечкен яньы фактларгьа эсасланып Б.Чобан-заде Истанбулгъа 1914 дегиль де, 1915 сенеси кеткенини исбат этмеге чалышаджакъмыз.
Биринджи факт. 1915 сенеси январь... Б.Чобан-заде Одессада булун-макьта. Шу куньлерде Халиль Чапчакъчынынъ язгьан бир мектюбинде буларны окъуймыз (Х.Чапчакьчы Одессада Новороссия университетининь тыб факультетинде окьумакьта): «Терджиман» газетеси идаресине. Кефе уездинде Бий-Эли кьариеси (кою) муаллими Усеин Расим эфендининь мухтерем «Терджиман»ымыз вастасыле кондермиш олдугьы 19 рублейи алдым. Аркьадашларымыздан Дж. Муртазаев, М.Дж. Енилеев ве Гь. Чо-ракьаев эфендилерле вукьу булан (олгьан) музакерелеримиз нетиджесинде парайы тамамиле тышарыда мухим ве муневвер бир тахсиль корьмиш ве бурада рус дарульфунуна кирмек ичюн хазырланмакьда булунмыш олан Чобан-заде Бекир Сыдкьи бирадеримизе вирмейи кьарарлаштырдыкь. Бу аркьадашымызы таныян Одесса ахунды фазилетлю
Сабирджан эфенди хазретлери дахи бу кьарарымызы пек мунасип булду. Маддий сыкьынтыда олан аркьадашларыны акьылдан чыкьармаяракь, он-лара ярдыма кьошан Усеин Расим эфендие ве достларына аркьадашларым намына беян-и-тешеккюр идерим» [5].
Ачыкь корюнгени киби, 1915 сенеси январь айында Б.Чобан-заде Одессада булуна ве рус университетине кирмеге азырлыкь корьмекте. Одессада оны гузель таныгьан кишилерден ахунд Сабирджан эфенди де Чобан-заде-ге маддий ярдым япылгьаныны такьдирлей... Бекир Чобан-задеге бериль-ген паранынь (19 кумюш) кучюни тасаввур этмек ичюн бойле ракьамларны кетирейик. О заманда бир фунт отьмек-5 капик фиятында эди (бир фунт - 409 граммгьа мусавийдир), бир фунт тувар эти - 40 капик, бир фунт сары ягь - 50 капик. Б.Чобан-заде соньундан, яни 1917 сенеси 23 июнь Буда-пештте язгьан, «Студент» шииринде Одессадаки аятыны, Х.Чапчакьчынен кьонушмаларыны бойле сатырларнен акс эткен эди:
О вакьытта падвалда яшай эди. Тапса кие, хардж эте, ашай эди. Тар пенджере алдында кокси ачыкь, Окьур эди, алдында бир лампачыкь. Тапмай коп гедже уйкьу тар кьапысын, Бундай кучюк одада о не япсын?
Сёйлеширдик серт кьышнынь таньынаджек Бизге не бар, кореджек, уйренеджек? Козюн ачар, гурь сачын сыйпар, кулер, Сонь козьяшдай джаныгьын тёкер, тёкер... [9, с. 44]
Экинджи факт. 1915 сенеси февраль. Б.Чобан-заде Одессада булуна. Шу куньлери Халиль Чапчакьчы Одессадан хабер бере: «Ялта дживары Де-рекой мухтерем имамы Хафуз Мустафа эфендининь зевдже-и-мухтеремеси хамиетли (ветанпервер) Хатидже ханым хэмширемизин, Одаманова, Беки-рова, Парпетова, Ибраимова, Аметова, Хатипова, Мансурская, Умерова, Сарычева ве Сеитумер агьанынь зевджеси Эдие ханым хэмширемизден то-плаюп кондердиги 31 рубле 50 капик парайы алдым. Бу парайы койдеш ве аркьадашым Джелиль эфенди Муртазаев иле пайлашмамыз тевсие идиль-миш исе де, биз экимиз де «Ялыбою джемиет хайриеси»нден сеневий ола-ракь учер юз рубле пара алдыгьымыздан, ве бу пара бизлере кифает итти-гинден, хамиетли хэмширелеримизин кондердиклери парайы бизден даха зияде мухтадж олан аркьадашларымыза вирмейи мунасип корьдик. Кечен дефа яздыгьымыз киби, арамызда хэпимизден зияде ярдыма мухтадж ве хакьлы олан миллий талими икмаль иле рус дарульфунуна кирмее хазыр-ланан Чобан-заде Бекир Сыдкьи эфенди бирадеримиз олдугьына бутюн аркьадашларымыз тарафындан кьарар вирильди. 31 рубле 50 капиктен 15 рублесини Чобан-заде аркьадашымыза вирдик. Дигер 15 рублесини де хич бир тарафтан ярдым корьмеен аркьадашымыз студент Мехметджан эфенди Енилеев кьардашымыз пара булунджая кьадар одюнч оларакь алды. Эли-мизде фазла пара кечтиги кунь озь арамызда бир «Татар талебеси касса-чыгьы» кьурмакь фикриндейиз. Бакьи (артып) кьалан 1 рубле 50 капиги де почта масрафларына кьулланмакьтайым... Кьырым мусульман ханым-лары арасында мектеплилерин халыны дюшюнип ильк оларакь талебелере ярдым элини узатан ялыбоюнда Дерекойлю ханым хэмширелеримиз хакь-кьымызда косьтердиклери мадий ярдым иле биз - Кьырым талебелеринде маддий муавенетин (ярдымны), маддий кьувветин бинь кьат февкьында (усьтюнде) булунан маневий бир кьуввет уяндырмышдырлар... [6].
Учюнджи факт. 1915 сенеси майыс. Б.Чобан-заде Одессада булунгьа-ны ишбу ашагьыдаки хаберден де ачыкь корюнмекте. Тамам шу арада, шу вакьытта «Терджиман» газетасына бойле хабер келе: «Кучюк-Озенбашлы хафуз Бекир эфенди Балыхчиев тарафындан Одессадаки мусульман тале-белер менфаатына оларакь Халиль Чапчакьчы намына кондерильмиш олан 5 рубле пара бу кере... Халиль эфенди вастасыле ве бутюн аркьадашла-рынынь мувафакьатыле (разы олмалары иле) талебеден Чобан-заде Бекир Сыдкьи эфендие теслим идильмиштир» [7].
Яни юкьарыдаки хаберлерден ачыкь корюне ки, 1915 сенесининь ба-
шындан, январь айындан, майыс айынаджек Бекир Чобан-заде Одес-сада булунып «рус дарульфунуна /университетине/ кирмеге азырлыкъ корьмекте эди. Шу себептен проф. Д. П. Урсунынъ монографиясындаки Ш.Бектуренинъ макъалесине берген бу изааты: «<...> летом 1914 года /Чобан-заде/ побывал в Крыму на летних каникулах. После них он вернулся в Стамбул продолжать учебу» (с. 262) янълыштыр. Бизим тюшюнджемизге коре, Б.Чобан-заде Къырымгъа 1914 сенеси къайткъан сонъ, Истанбулгъа 1914 сенеси дегиль де, 1915 сенесининъ я язында, я да кузюнде кеткендир.
Даа бир янълыш усьтюнде айрыджа токъталайыкъ. Бекир Сыдкъи кен-дисининъ «Чобан-заде» шеклиндеки сойадыны не вакъыт къулланмагъа башлады? Проф. Д.П.Урсу чокътан-чокъ араштырмалардан сонъ, бойле не-тиджеге келе: «Итак, можно прийти к выводу, что на современное написание своей фамилии («Чобан-заде») Бекир перешел лишь после возвращения в Крым со второй половины 1920 года» [4, с. 17].
Д. П.Урсунынъ бу изааты тамамынен янълыштыр. Бундан эвельки базы макъалелеримизде «Ветан хадими» (1906-1908) газетасы акъкъында ба-ягъы тафсилятлы малюмат берген эдик [3]. Бекир Сыдкъи даа 13 яшында бала экенде, кендисининъ сойадыны «Чобан-заде» оларакъ имза аткъаны иште шу «Ветан хадими» газетасында растладыкъ. Яни 1906 сенеси майыс айында Къарасувбазар рушдиесинде джемаатчылыкъ иштиракинен имти-ханлар кечкен сонъ, Бекир Сыдкъи сёзге чыкъып рушдие талебелери адын-дан чокъ меракълы бир чыкъыш япып кендисининъ рушдиеге кирмеси ве окъувында маддий дестек косьтергенлерге тешеккюратыны бильдире. Дже-маатны айретте къалдыргъан бу чыкъышы шу куньлери «Чобан-заде» сой-адынен «Ветан хадими» газетасында нешир олуна. Иште, Чобан-заде сой-адынен имзалангъан шу чыкъышыны ашагъыда мисаль оларакъ кетиремиз:
«Эй, велий-и-нимет (нимет саиби) эфендилерим! Эгер мугъайр-и-эдеп ве тербие (эдепсизлик ве тербиесизлик) демиюп, лютфен къулунъыза муса-аде буюрсанъыз, хузурынъызда аджизане бир къач сёз сёйлемек истиюрым.
Джумленъизин малюмидир ки, шу севгили Ветанымызын энъ факъир бир эвлядынынъ огълуйым. Бичаре педерим (бабам) окъуйып язмакъ биль-медиги халда, видждана беллемиш (бель эткен) ве тамамиле кендисине бир къанаат хасыл олмалыдыр ки, дёрт-беш сенеден бери бенденъизи, джума-дан маада, (джума куньлеринден гъайры) бир кунь яз ве къыш эвде быракъ-мыюп мектебе кондерир иди.
Не чаре ки, педеримин чалышуп-чапаландыгъы нисбетте мемлекети-мизде булунан мектеплерде тахсиль корьмек мумкюн оламыюр иди.
Бугунь шукюрлер олсун Дженаб-ы-Хакъа ки, мюджерредсиз (тек ол-магъан) эфендилеримизин мемлекетимизде бирер рушдие мектеби ачаракъ, шу кучюк яшымызда бизлери ильм ве ирфан денилен тарикъ-и-неджате (къуртулыш ёлуна) севкъ иттинъиз (кондердинъиз).
Эбет, шу мектеп дедигимиз дар-уль-фунуннынъ ачылмасына себеп ол-дугъынъыз киби, окъуйып-язмакъ шерефини де кенди эвлят ве джигер-па-релеринъизден (севимли балаларынъыздан) айырмыюп факъыр ве зенгин авам (саде) ве хаваси (асылзаделерни) бирден бойле бир нимете наиль ит-тинъиз. Бунъа да къанаат итмеерек, эвляд-ы-фукъаранынъ китап ве эльбисе (кийим) акъчаларыны да кисе-и-хамийетинъизден (миллий онъур, ветан-перверлигинъизден) инает буюрдынъыз!
Эй, хами (къоруйыджы) эфендилер! Яшым ве башым вакъаа (акъикъа-тен) пек кучюк исе де, бу къадар ачыкъта корьдигим бир лютфу анълама-яджакъ дереджеде дегилим. Зира (чюнки) бойле бир эйилиги корьмемек ве анъламамакъ булутсыз хавада кунеш корьмемек кибидир.
Бинаэн алейх (бундан долайы), джумле факъыр аркъадашларымле бера-бер бу лютфунъыза къаршы гедже ве куньдюз хайыр дуа идеджегиз.
Эгер шу лютфунъызы узеримизден бир муддетлик даха эксик итмееджек олурсанъыз, хич кимсенинъ севмедиги джехалет белийесинден (феляке-тинден) бизи къуртарып, та къыямете къадар сиз, велий-и-ниметлеримизе, хайыр дуада булунаджагъымызы джан ве дил-и-арз иле яшасун мемлекети-мизде эрбаб-ы-ирфан (билим адамлары) ве маарифперверан демекле хатим келям эйлерим!» [8].
Ачыкъ ве айдын корюнгени киби, Бекир Сыдкъи кендисининъ сойады-ны «Чобан-заде» сыфатында 1920 сенеси дегиль де, 1906 сенесинден бу шекильде косьтерип кельмекте эди. Эм де макъалемизнинъ юкъарыда ке-тирильген мисаллеринде, «Терджиман»да нешир этильген Одессадан ха-берлерде, 1915 сенеси де сойады «Чобан-заде» оларакъ къайд олунмакъта...
Б.Чобан-заденинъ иджады ве биографиясы узеринде чалышмалар девам этеркен, табий оларакъ янъы-янъы малюматлар, бугуньде белли олмагъан весикъа ве хаберлер пейда оладжагъына ич шубемиз ёкътыр. Буларнынъ джумлеси онынъ фаалиети даа терен ве даа объектив ве догъру огрениль-месине ярдым этеджектир. Б.Чобан-заде дюньяджа мешхур алим ве языд-жы оларакъ кенди фаалиетинен дженктен эвель шекилленген къырымтатар классик эдебиятынынъ юксеклиги ве сыфат дереджесини косьтермектедир. Онынъ бедий иджады ве ильмий чалышмалары умумджихан вариети ве зенгинлиги сыфатында эртарафлама кениш суретте ве бутюн теренлигинен огренмелидир.
КЪУЛЛАНЫЛГЪАН ЭДЕБИЯТ
1. Бекир Сыдкъи. Идарее мектюп // Терджиман. 1909. №25. июнь 16.
2. Булдеев А. Татарский поэт Чобан-Заде // Голос Крыма. 1942. 12 апреля (По книге: Урсу Д.П. Бекир Чобан-заде. Жизнь. Судьба. Эпоха. Симферополь: Крымучпедгиз, 2004. 276 с.)
3. Керимов И.А. «Ветан хадими» газетасы (1906-1908): тарихи ве мундериджеси // Ученые записки КИПУ, 2010. Выпуск 23. С. 105 - 111; Керимов И. А. Историческое значение газеты «Ветан хадими» (Карасувбазар, 1906 - 1908 гг.) // Научный вестник Крыма, 2018. № 3 (14). С. 1 - 24.
4. Урсу Д.П. Бекир Чобан-заде. Жизнь. Судьба. Эпоха. Симферополь: Крымучпедгиз, 2004. 276 с.
5. ЧапчакъчыХ. Идарее мектюп // Терджиман. 1915. №10. январь 14.
6. Чапчакъчы Х. Ялыбою ханымларынынъ хамиети. Одессадаки талебелеримизин тешеккюри // Терджиман. 1915. №25. январь 31.
7. ЧапчакъчыХ. Кучюк-Озенбаш // Терджиман. 1915. №105. майыс 12.
8. Чобан-заде Бекир Сыдкъи эфендининъ нуткъу // Ветан хадими. 1906. № 18. июнь.
9. Чобан-заде Б. Меним языларым... Акъмесджит: Тарпан, 2009. 252 с.
10. Otar I. Kirimli ttirk §air ve bilgini Bekir Sidki £obanzade. Istanbul: Lebib Yalkin yayimlari. 1999. 288s.; Айны фотокопия: Урсу Д.П. Бекир Чобан-заде. Жизнь. Судьба. Эпоха. Симферополь: Крымучпедгиз, 2004. 276 с.
Некоторые хронологически спорные данные в биографии Бекира Чобан-заде
Исмаил Керимов
(ГБОУВО РК «Крымский инженерно-педагогический
университет имени Февзи Якубова»; Крымский
научный центр Института истории им. Ш. Марджани АН РТ)
Аннотация. Научная биография известного крымскотатарского писателя и ученого-тюрколога проф. Б.Чобан-заде (1893-1937) хотя и разрабатывалась монографически, к сожалению, из-за недоступности редчайших крымскотатарских арабографичных источников (например, газеты «Ветан хадими» /1906-1908/, журналов «Ешиль ада» /1920/ и «Бильги» /1921/), некоторые факты и цифровые данные, связанные с временем его поступления в начальную школу, обучения в карасувбазарском рушдие и турецком лицее «Султание», неправильно отражены в прежних научных работах и изысканиях. В статье приводятся конкретные факты, подтвержденные в опубликованных записках и письмах самого Б.Чобан-заде, которые вносят ясность в хронологию биографии и объективно отражают жизненный путь ученого.
Ключевые слова. Крымскотатарские ученые, биография Б.Чобан-заде, редкие арабографичные источники на крымскотатарском языке.
Для цитирования: Керим И. А. Бекир Чобан-заденинъ биографиясында базы худжур ракъамлар // Крымское историческое обозрение. 2019. № 2. С. 155-164. DOI: 10.22378/kio.2019.2.155-164
Сведения об авторе: Исмаил Асанович Керимов - доктор филологических наук, профессор, директор Научно-исследовательского института крымскотатарской филологии, истории и культуры этносов Крыма, ГБОУВО РК «Крымский инженерно-педагогический университет имени Февзи Якубова» (295015, Учебный пер., 8, Симферополь, Республика Крым, Российская Федерация); ведущий научный сотрудник Крымского научного центра Института истории им. Ш. Марджани АН РТ (420111, ул. Батурина, 7А, Казань, Российская Федерация); alimes@mail.ru
Some chronologically disputable facts in the biography of Bekir Choban-zade
Ismail Kerimov
(SBEEHE RC "Fevzi Yakubov Crimean Engineering and Pedagogical University"; Crimean Scientific Center of Sh. Marhani Institute of History of AS RT)
Abstract: Well-known Crimean Tatar writer and a turchology scholar, professor Bekir Choban-zades (1893-1937) scientific biograpy being developed like monograph, to a great misfortune, because of a lack of very rare Crimean Tatar arabographic sources, such as newspaper "Vetan Hadimi" (1906-1908), magazines "Eshil Ada"(1920) and "Bilgi" (1921), some facts and datas connected with the time of his entering the primary school, period of study in Karasu-bazar Rushdie school and in Turkish "Sultanie" Lyceum are given incorrectly in works of previous researchers.In this article are introduced exact facts which were confirmed by notes and letters of B. Choban-zade himself, they make the biographical chronology clear and give objective information on the way of life of this well-known scholar.
Keywords: Crimean Tatar scholars, biography of B. Choban-zade, rare ara-bographic sources on the Crimean Tatar language
For citation: Kerimov I. A. Some chronologically disputable facts in the biography of Bekir Choban-zade. Krymskoe istoricheskoe obozrenie=Crimean Historical Review. 2019, no. 2, pp. 155-164. DOI: 10.22378/kio.2019.2.155-164
REFERENCES
1. Bekir Sydk"i. Idaree mektyup [Letter in edition] Terdzhiman [Translator], 1909. No 25. June 16.
2. Buldeev A. Tatarskij poet Choban-Zade [Tatar's poet Choban-Zade] Golos Kryma [The Voice of the Crimea]. 1942. 12 April
3. Kerimov I.A. «Vetan hadimi» gazetasy (1906-1908): tarihi ve munderidzhesi [History and content of the newspaper "Vetan hadimi"] Uchenye zapiski KIPU [Proceedings of the Crimean Engineering and Pedagogical University], 2010. Issue 23. Pp. 105 - 111; Kerimov I.A. Istoricheskoe znachenie gazety «Vetan hadimi» (Karasuvba-zar, 1906 - 1908 gg.) [Historical significance of the newspaper "Vetan hadimi»] (Ka-rasuvbazar, 1906-1908)] Nauchnyj vestnikKryma [Scientific Bulletin of the Crimea], 2018. No 3 (14). Pp. 1 - 24.
4. Ursu D.P. Bekir Choban-zade. ZHizn'. Sud'ba. Epoha [Bekir Choban-zade. Life. Fate. Era]. Simferopol: Krymuchpedgiz, 2004. 276 p.
5. Chapchak"chy H. Idaree mektyup [Letter in edition] Terdzhiman [Transla-tor].1915. No10. January 14.
6. Chapchak"chy H. YAlyboyu hanymlarynyn" hamieti. Odessadaki talebelerimi-zin teshekkyuri [Patriotism of Yaliboyu women. Gratitude of our students in Odessa] Terdzhiman [Translator]. 1915. No 25. January 31.
7. Chapchak"chy H. Kuchyuk-Ozenbash [Kuchuk-Ozenbash]. Terdzhiman [Translator]. 1915. No 105. May 12.
8. Choban-zade Bekir Sydk"i efendinin" nutk"u [The speech of Mr. Choban-zade Bekir Sydk i]. Vetan hadimi [In the service of Motherland]. 1906. No. June
9. Choban-zade B. Menim yazylarym ... [My records...]. Simferopol: Tarpan, 2009. 252 p.
10. Otar I. Kirimli turk §air ve bilgini Bekir Sidki ?obanzade. Istanbul: Lebib Yalkin yayimlari. 1999. 288s.; The same photocopy: Ursu D.P. Bekir CHoban-zade. ZHizn'. Sud'ba. Epoha [Bekir Choban-zade. Life. Fate. Era]. Simferopol: Krymuch-pedgiz, 2004. 276 p.
About the author: Ismail Asanovich Kerimov - Dr. Sci. (Philology), Professor, Director of the Scientific Research Institute of the Crimean philology, history and culture of the Crimean ethnos, SBEEHE RC "Fevzi Yakubov Crimean Industrial Pedagogical University" (295015, Simferopol, Uchebniy lane, 8, Crimea, Russian Federation); Leading Researcher of the Crimean Scientific Center of Sh. Marjani Institute of History of Tatarstan Academy of Sciences (420111, Kazan, Baturin Str.,7A, Russian Federation); alimes@mail.ru
